SARATOK, 15 Jan: Menua Nanga Grenjang udah dipilih nyadi palan baru endur ngatur Krian Nature Challenge (KNC) 2024.
Kaban Kunsil Nengeri (ADUN) Krian, Friday Belik madahka bisi dua program ke pemadu besai deka diatur sereta dikeandal ulih matak penatai mensia mayuh ngemataka pekit tu ila iya nya Pekit Rakit Safari enggau Pekit Lumba Ensikal.
“Pagi tadi kitai udah baum ungkup pengawa nyikap diri ngatur program Krian Nature Challenge 2024.
“Nyadi komiti udah setuju deka ngatur Pekit Rakit di Ulu Krian enggau Mountain Bike Xtreme Challenge baka ke udah diatur taun siti nyin kemari,”ku iya.
Iya bejaku munyi nya pengudah ngulu aum komiti pengatur Krian Nature Challenge diatur ba Opis Pelilih Saratok ditu, pagi tadi.
Ke penerang, KNC sebedau tu diberi nama Krian Mountain Bike Xtreme Challenge udah mujur matak 150 iku pesereta ari dalam enggau menua luar.
Ku tandu Friday pengawa ngatur KNC 2024 deka diatur pengelama dua hari kena 29 enggau 30 June.
“Taun tu kitai deka mindahka palan endur ngatur MTB ngagai Ulu Krian sereta udah baum dalam netapka sechara tentatif hari bulan ke disetuju iya nya kena 29 enggau 30 Jun 2024.
“Lumba ensikal deka diatur ba Nanga Grenjang lalu Pekit Rakit diatur ba Nanga Budu,” ku iya.
Nangkan ke nya, Friday ngarapka dua bengkah aktiviti nya ulih matak mayuh penyereta ari luar Sarawak baka ke kala diatur sebedau tu.-TVS
