DEBAK, 13 Jan: Kerejasama entara raban sekula enggau Gerempung Apai Indai enggau Pengajar (PIBG) Sekula Primary (SK) Bungin dipuji.
Sapit Menteri Pemansang Orang Indu, Anak Mit enggau Komuniti Sarawak, Datuk Mohd Razi Sitam madah, ari pengawa begempung baka ngatur program lumba ninting taun nya mega ulih ngedutka kaul enggau pangan diri ke tau bendar pulaika penguntung ngagai nembiak ba sekula nya empu.
“Aku chukup temegah ati meda komitmen dipandangka entara raban sekula enggau PIBG ke udah mujur ngatur lumba tu.
“Tu dikeandalka tau meri pemujur ari sukut pelajar enggau Kokurikulum, lalu aku andalka kerejasama baka tu ulih terus dipejalaika ba taun dudi ke pemaik nembiak sekula ditu,” ku iya.
Mohd Razi ke mega Kaban Kunsil Nengeri (ADUN) Saribas madah munyi nya lebuh bejadika Pekit Lumba Ninting Taun ke diatur Sekula Primari (SK) Bungin ditu kena Hari Tiga tu tadi.
Nambah nya ku iya, ari pemujur ngatur lumba ninting taun nyadi pelasar pemadu nemban endur ngadaka atlit ke nyulut jemah.
“Kelimpah ari nya aku mega ngarapka ari pengawa ngatur lumba baka tu ulih ngadaka atlit ke nyulut nyentuk ngagai ikas ke lebih tingi.
“Aktiviti lumba tu mega sebagi ari dua tuju besai ke bisi dalam pelin besai pemansang pelajar dikumbai PIPP.
“Udah nya, kedua dikena ngansah penau mensia lalu ketiga negapka sekula nasional. Enti dipeda ari pengawa lumba endang sigi nyata bakat nembiak ulih dikemansangka,” ku terang iya.-TVS
