DEBAK, 13 Jan: Projek sambung ngemanah Jalai Suri- Tuie urung 1.8 kilometer pemanjai beungkus RM3 juta deka berengkah enda lama agi.
Sapit Menteri Pemansang Orang Indu, Anak Mit enggau Komuniti (KPWK) Sarawak, Datuk Mohd Razi Sitam madah, pengawa meresa taba projek nya deka diatur kena 16 haribulan tu.
“Projek sambung jalai ari Surie-Tuie urung 1.8 Kilometer pemajai tu udah dikemendarka enggau agih RM3 juta lalu deka ditinda sereta pengawa meresa taba deka diatur kenaka 16 Januari tu.
“Nitihka taga ke udah diperambu sebedau tu reti nya jalai puntul ari Debak-Tuie-Pusa nadai agi udah tu laban jalai nya ila deka digaga nitihka standard lalu deka besambung magang,” ku iya.
Razi ti mega Kaban Kunsil Nengeri (ADUN) Saribas madah munyi nya lebuh dirandau pengari TVS Saratok pengudah bejadika Pekit Lumba Ninting Taun SK Bungin, kena Hari Tiga tu tadi.
Berebak enggau nya, Razi madahka diri enda nyima lebuh macha sekeda penemu dibantaika mensia mayuh ba media rama bekaul enggau jalai nya ke balat rusak sebedau tu.
Ku iya, sida mansutka penemu nya beduduk ari pengirau ati meda jalai rusak lalu ngarapka jalai nya dikemanah enggau lengkas.
Nyadi perintah endang bisi perambu ngemanahka jalai nya semina penerang nya empai datai ba rayat, ku iya. -TVS
