SARATOK, 8 Jan: Kaban komiti Kaunsil Dagang enggau Industri China Pampang Saratok (SCCCI) ke baru dichiri mangku pengawa dikearap terus segulai sejalai dalam ngemujurka semua pengawa lebih agi ba pengawa dagang ke pemaik mensia mayuh.
Kaban Kunsil Nengeri (ADUN) Kalaka Mohd Duri madah, raban orang dagang mesti nguna manah peluang ke bisi disedia perintah nengeri ari pemayuh bajet ke udah diungkup ungkup projek pemansang di nengeri tu.
“Aku ngarapka semua berengkah ari presiden nyentuk ke komiti enggau kaban gerempung tu patut terus segulai sejalai ngemajuka dagang diri empu,” ku iya.
Mohd Duri madah munyi ba sebengkah pengerami ke diatur Kaunsil Dagang enggau Industri China Pampang Saratok (SCCCI) ba Diwan Sri Krian kena Hari Enam.
Ku iya, raban orang dagang lebih agi di Saratok patut nemu ngerebut peluang ari bajet ke pemadu besai kala dibantaika Perintah Sarawak apin lama dikena ngerembaika dagang sida.
“Pekara ke pemadu beguna kitai ke nyadi orang dagang patut nemu ngambi peluang laban taun tu bajet pemadu besai dalam sejarah nengeri Sarawak iya nya manggai RM12.363 bilion.
“Nadai nengeri bukai di Semenanjung kala mantaika bajet ngemesai tu tang kitai di Sarawak berani laban kitai dekaka belanja dikena ngatur pemansang ke pemaik rayat,” ku iya.
Ku terang Mohd Duri di Sarawak semua komuniti nyengkaum raban bansa China, Melayu, Iban, Bidayuh enggau ke bukai bela diperansang sereta ngembuan peluang bedagang ke sama.-TVS
