SARATOK, 31 Dis; Taun 2023 tentu iya udah ninggal bemacham kenang ba sesiku orang lalu pia mega sekeda kitai tentu gaga enti juluk ati sebedau tu udah tejapai.
Nyadi ngagai kitai ke bedau nyapai juluk ati anang tusah ati laban penatai taun baru 2024 tentu iya meri kitai peluang endur nyapai juluk ati nya.
Berebak enggau pengari TVS Saratok bisi ngerandau sekeda orang lalu tebal agi sida minta pengelantang, pengerai sereta ngarapka bulih jereki ke lebih manah ba taun baru.
Siku pengajar Beti Ujak, 39 taun ari debak madah, iya ngarapka ba taun 2024 sida sebilik terus gerah mudah ngulihka jereki enggau diberi pengerai ti manah agi ari taun ke udah.
”Meri Selamat Taun Baru 2024 ngagai semua. Arapka taun 2024 kitai bela mujur agi pengawa enggau bulih rejeki ke lebih manah ari taun tu.
“Pia mega minta Petara meri pengerai enggau pengelantang ngagai semua kitai,” ku iya.
Ba siku peranak Debak Azman Mataril iya ngarapka pekara ke bedau dijapai ba taun 2023 deka tejapai ba taun baru baka ari sukut ekonomi minta Tuhan meri pemujur.
Udah nya, siku penanyi tebilang Iban Lucy M meri pesan Selamat Taun Baru 2024 nuju semua bala peminat iya lalu besampika semua terus gerai sereta lantang senang nguan menua.
“Selamat taun baru 2024 ngagai semua ngarap ngajihka semua gayu guru gerai nyamai nguan menua,” ku iya.
Nangkan ke nya, semua raban bilik Berita TVS Iban meri terima kasih ke sukung ari mensia mayuh ngelama tu ngarapka taun 2024 terus meri berekat ti belimpah ngagai semua. -TVS
