SARATOK, 29 Dis: Raban ke bisi pengelandik ba sesebengkah main asal tauka pengawa lama lebih agi ba komuniti Iban diperansang ngerembaika pengelandik nya nengah chara ngajar rebak baru awak sama ngingatka main asal nya.
Kaban Kunsil Nengeri (ADUN) Krian Friday Belik madah, kelimpah ari nya sida ke udah nyulut mega enda tau enda nguji ngangkatka main asal nya ngagai tikas ke lebih tinggi.
“Nya alai, enti kitai bisi pengelandik ba (main asal) utai tu tau dikerembaika kitai (ngagai orang bukai).
“Kitai mega mesti nemu nambahka reti utai ke udah dipelajarka nya tadi ngambika lebih nyulut sereta terus dikemansang ngagai tikas ke lebih tinggi,” ku iya.
Iya madah munyi nya rambau Program Tamat Kelas Ajat Iban enggau program bejadika Serakup Indu Rumah Jimmy Sanai, Ulu Brayang ditu pagi tadi.
Nangkan nya Friday madah, Perintah Sarawak endang seruran meri sukung ari segi belanja dikena ngidup enggau ngerembaika main asal ti nyadi pesaka sesebengkah komuniti.
Iya mega madah, ari chara bekempit enggau perintah mega ulih mantu ngemansangka agi main asal ke bisi ba rumah panjai.
“Enti kitai ngembuan pengelandik ke chukup, anang alang-alang enti bisi minat teruska aja laban perintah menua Sarawak sigi nyukung sereta mantu.
“Nya alai, tu siti ari kebuah penguntung enti kitai bekempit enggau perintah baka pengari rayat awakka kita nyamai ngenataika peminta (belanja) ke diguna kita dikena ngangkatka main asal kitai ba rumah panjai,” ku terang iya.
Sama bisi datai bini ADUN Krian, Ani Isek, Pegawai Pelilih Mit (SAO) Roban, Steve Miller Nuas, bala kaunselor Opis Pelilih Saratok (MDS), tuai rumah besemak enggau ke bukai.-TVS
