SARATOK, 23 Dis: Perambu Universiti Malaya (UM) ti deka muka pampang kampus sereta nyendiaka kus Sempekat Malaysia 1963 (MA63) enggau Tanah Adat Bansa Asal (NCR) endang langgur ke chukup nemban lalu patut disukung sereta diterima rayat di menua tu.
Kaban Kunsil Nengeri (ADUN) Krian Friday Belik madah, nengah pemisi kus nya jemah tentu deka meri peluang ngagai peranak sarawak lebih mereti agi pasal MA63 enggau NCR.
“Nyadi anak Sarawak aku sigi nerima manah perambu Universiti Malaya ti deka numbuhka pampang kampus sida di Sarawak.
“Enti nyadi nyata nya siti pemutus ke chukup manah ungkup kitai di Sarawak.
“Nya mega deka nyadi siti ‘landmark decision’ laban nyangka ulih meri peluang ngagai peranak Sarawak belajar enggau lebih dalam pasal MA63 enggau NCR,” ku iya.
Friday mansutka penemu nya lebuh dipinta meri timbal bekaul senentang langgur UM ti deka muka pampang kampus di Rajang, Sarawak munyi udah dipadahka Premier Sarawak Datuk Patinggi Abang Johari Tun Openg ba sebengkah pengerami di Kuching empai lama.
Iya meri timbal nya pengudah ngulu pengerami ngenang jasa Siku Pegawai Pelilih Saratok, Haron Mahidi ti deka pinchin diatur ba Diwan Sekula Cina (SJKC) Myn Syn lebuh Hari Empat.
Udah nya ku Friday, ari pemisi kus nya dipejalaika UM jemah mega ulih mantu mutarka isu bekaul enggau MA63 enggau NCR ke suah dipetalatka mensia mayuh di menua tu.
“Dua pekara tu mega suah dipetalatka kitai di Sarawak lalu enti dipelajarka enggau lebih dalam agi nyangka pemereti mensia mayuh di Sarawak ditu bekaul enggau MA63 tauka NCR deka manah agi.
“Pia mega, enti udah bisi orang ke landik dalam undang-undang tu nyangka pengelimpang runding senentang tu ulih diputarka ba timpuh panjai,” ku iya.-TVS
