SARATOK, 23 Dis: Jasa sereta pengeransing Pegawai Pelilih (DO) Saratok Haron Mahidi dalam ngereja pengawa ungkup pelilih Saratok deka terus dikenang.
Kaban Kunsil Nengeri (ADUN) Krian Friday Belik madah, udah tu pelilih Saratok deka lenyau siku pegawai ke chukup bepenau sereta landik ngatur pengawa.
“Enti Tuan Haron udah pinchin ila kitai deka lenyau siku pegawai ke chukup bepeneleba, mayuh penemu, pengelandik sereta bepenau bejalaika pengawa perintah lebih agi ba tikas pelilih,” ku iya.
Iya madah munyi nya nyerumba pengerami Beserumpu Ngenang Jasa Pegawai Pelilih Saratok, Haron Mahidi diatur ba Diwan Sekula China (SJKC) Myn Syn Saratok lebuh Hari Empat.
Nya alai ku Friday, bala Raban Tuai Rumah enggau Tuai Raban Bansa (KMKK) di Saratok dikearapka terus bejalaika pengawa enggau manah nitihka penemu ajar ex-mentor sida ngelama tu Haron Mahidi.
“Aku nemu bala tuai raban bansa tuai-tuai rumah mega deka lenyau siku mentor siku pengiring siku kaunselor ke mayuh meri sukung sereta bantu lebuh bejalaika tanggung pengawa.
“Nyadi ari sukut pemansang mensia iya (Haron) ke nyadi DO endang mayuh meri bantu dalam mekuh pengawa ngatur pemansang mudal mensia ba kitai di Saratok,” ku iya.
Ke penerang, Haron udah gawa perintah sepengelama 32 taun belabuh ari 2 Disember 1991.
Ba sepemanjai timpuh nya, Haron kala gawa ba Opis Kereja Raya (JKR), Opis Pelilih Mit Belawai, Opis Pelilih Daro, Unit Perambu Ekonomi (EPU) Sarawak, Opis Pelilih Meradong enggau Opis Pelilih Lundu sebedau pindah lalu pinchin di Saratok kena sehari tu (23 Disember).-TVS
