SARATOK, 21 Dis: Mensia mayuh lebih agi di Krian dilalau patut ngadang taja Opis Menteri Pengerai Malaysia (KKM) nyemetak madahka pemutus nadai ibuh bejalaika Atur Mindah Betagang (PKP) taja pan kes baru covid-19 dirikodka seruran nambah.
Kaban Kunsil Nengeri (ADUN) Krian Friday Belik madahka rayat mayuh patut terus nyaga pengerai diri sereta patut lengkas nganjung diri ke klinik nyema berasai enda nyamai isi tauka tabin.
“Aku ngerah kitai di Saratok lebih agi di Krian nyerumna kitai deka ngintu Hari Krismas udah nya ditampung enggau Taun Baru.
“Nyadi patut bela ngadang laban enti nitihka ripot kes endang iya bisi niki ninting hari lalu aku udah beratika pan orang ke renga diatu majak mayuh.
“Taja pia kitai enda nemu sekalika nya Covid tauka ukai,” ku iya.
Friday madah munyi nya pengudah nutup Pekit Sarawak Minecraft Championship diatur Turu Ekonomi Gagasan Anak Sarawak (TEGAS) ba Diwan Sri Krian, kemari.
Sama bisi datai Residen Bagi Betong Michael Richard Abu Nawas, SAO Pelilih Saratok Laga Kueh, Menijar Kanan Tegas Frederick Kelvin enggau ke bukai.
Nangkan ke nya, ku Friday mensia mayuh enda tau enda beratka pengerai diri baka seruran betuchika jari enggau bekenaka sengkabung mua ba palan ke mayuh mensia.
“Nya alai, sama-sama kitai bejejaga titihka baru SOP sebedau tu baka bekenaka sengkabung mua, penuchi jari (Sanitizer) kelimpah nyeliahka diri ngagai tugung bala mayuh.
“Diatu amat mayuh orang bebelika barang dikena ngintu Krismas, nyadi kitai patut bejejaga dikena nyaga diri sebilik enggau mega orang bukai,” ku iya. -TVS
