SPAOH, 20 Dis: Agih belanja sepenyampau RM30 juta ba baruh Ejensi Pemansang Bagi Menua Betong (BDDA) udah dikemendarka dikena ngemanah jalai Ulu Rimbas.
Sapit Premier Sarawak, Datuk Amar Douglas Uggah Embas madahka, projek ngemanahka jalai Ulu Rimbas nya deka berengkah dipejalaika ba taun 2024.
“Nyadi siti projek ke deka dipejalaika BDDA ba taun baru (2024) iya nya ngemanahka agi jalai Ulu Rimbas nengah agih belanja RM30 juta,” ku iya.
Uggah ke mega Kaban Kunsil Nengeri (ADUN) Bukit Saban madahka, jalai Ulu Rimbas sepemanjai 22 kilometer nya udah dalam rintai projek BDDA Lumpar ke-2.
Iya mansutka pekara nya ngagai media pengudah tembu Randau enggau Kaunter Jubilee Occupation Ticket (JOT) ungkup rayat di menua Ulu Rimbas, Rimbas Tengah sereta Babu Debak ba Rumah Rayong Layang, Nanga Lop, ditu kilah ensana.
“Nyadi pekara nya deka diperatika bala komiti ba taun 2024 tu ila.
“Bisi 22 kilometer pemanjai iya nyadi jalai nya udah lama tembu tang diatu deka ditangkir, digaga lurus lalu dikemanah mih,” ku iya.
Uggah nerang projek nya endang dibaruh perambu BDDA sereta udah dipasuk dalam rintai tusun projek ke deka dikemansang ba lumpar kedua udah tu ila.-TVS
