SPAOH, 20 Dis: Chairman Komiti Penyangga Penusah Sarawak (SDMC) Datuk Amar Douglas Uggah Embas madahka sida diatu agi nganti pemutus tauka tesau pemadu baru ari Opis Menteri Pengerai Malaysia (KKM) senentang atur nagang pengerekai penyakit Covid-19 di menua tu.
“Nyadi nitihka ripot ari KKM madahka kes Covid kitai di Malaysia termasuk enggau kitai di nengeri Sarawak tu bisi betambah.
“Nya alai, kitai agi nganti pemutus ari KKM, nama atur ke patut digaga kitai nyema penyadi nya majak raya.
“Berebak enggau nya, kitai mesti nyaga pengerai diri,” ku iya.
Iya ke mega Sapit Premier Sarawak madah munyi nya ngagai media pengudah tembu Randau enggau Kaunter Jubilee Occupation Ticket (JoT) ungkup rayat di menua Ulu Rimbas, Rimbas Tengah enggau Babu Debak ba Rumah Rayong Layang, Nanga Lop, ditu kilah ensana.
Nangkan ke nya, iya madah SDMC tetap ngelalau mensia mayuh ba menua tu, patut seruran bejejaga sereta anang tebelengga lebih agi ba pekara ke bekaul enggau pengerai.
“Lalau SDMC ngagai rayat anang enda ngadang, sama ngintu pengerai diri empu lalu enti kitai bisi lain asai, bisi renga enda nyamai, mesti ngagai klinik awak ke utai nya lalu ulih diperesa lalu kitai ulih nemu kitai nya kena sakit (Covid) tauka enda.
“Nya alai, sama nyaga diri enti kitai begempuru betubuh mayuh tau enti bisi sengkarung mua tau ngena mih nya,” ku iya.
Sama bisi ngulu pengawa nya bini Sapit Premier Sarawak Dato Doreen Mayang, Pegawai Opis Tanah enggau Survei Bagi Menua Betong Morris Nayup, bala tuai opis perintah enggau ke bukai.-TVS
