KOTA SENTOSA, 16 Dis: Gerempung Budaya Kadazan Dusun (KDCA) Pampang Sarawak udah mujur bejadika opis baru sida bepalan di Kota Sentosa, Kuching malam tadi.
Chairman KDCA Sarawak James Samid madah, pemisi opis baru tu deka ngelantangka kaban gerempung nya ngatur sebarang aktiviti ke bekaul baka Kelas Ajat Tradisional, Nyait Pekayan Tradisional, Kelas Jaku Dusun enggau ke bukai.
“Aku ngarapka enggau pemisi opis baru tu KDCA Sarawak ulih ngatur sebarang aktiviti enggau kelas main asal baka Kelas Magagung, Ajat Asal, Kelas Bejait Pekayan Tradisional enggau Kelas Jaku Dusun,” ku iya.
James madah munyi nya lebuh bejadika opis baru Gerempung Budaya Kadazan Dusun Pampang Sarawak di Kota Sentosa, Kuching lebuh Hari Lima.
Kelimpah ari nya, ku James pemisi opis baru nya mega chukup beguna dikena ngetanka main asal enggau jaku Kadazan Dusun ke majak tenggelam.
“Tu (opis) beguna bendar dikena ngetanka budaya enggau adat etnik Kadazan Dusun.
“Diatu nyau deka semua rebak baru bala anak kitai bansa Dusun enda nemu bejaku asal aki ini sida empu lebih agi sida ke diau ba mengeri endang enda nemu jaku Dusun,” ku iya.
Ke penerang, KDCA Sarawak ditumbuh kena 30 Oktober 2022 lalu naka diatu udah ngembuan urung 150 iku kaban ke berejister.
Ba pengerami nya, mensia mayuh ke bisi datai diperindang bala raban nembiak ke baru tembu Kelas Nebah Sape dibaruh program kerejasama KDCA Sarawak enggau Kota Sentosa Sape Lesson (KSSL) diajar pengajar Dines Ngau Wan.
Ungkup penemu, KSSL tu iya nya sebengkah Kelas Belajar Kereban Muzik Sape ditumbuhka siku orang ke tebangkar nebah sape ke mega pengajar muzik sape ngati kediri lalu nguna opis KDCA Sarawak endur ngatur Kelas Belajar Muzik Sape nya.-TVS
