SARATOK, 16 Dis: Opis Bomba enggau Penyah Penusah Malaysia (JBPM) naka diatu semina nguna dua chara dikena mutarka penanggul suntuk staf ba balai sida.
Direktor Opis Bomba enggau Penyah Penusah Malaysia (JBPM) Sarawak, Datu Khirrudin Drahman madah ambika chunto, nyema ba balai JBPM Saratok enda chukup staf dia indu opis deka ngemendarka atur nambahka penyampau raban Bomba Volunteer enggau Pegawai Bomba Bantuan.
“Kebendar kitai nitihka (pemutus) pansik ari opis besai bekaul senentang penyuah enggau pemalat penusah angus nyadi ba sesebengkah endur.
“Nya kebuah diatu kitai mayuh agi ngaul komuniti laban baka ditemu kitai enti deka nambah raban bomba nyangka deka meri empas ngagai bajet perintah.
“Beduduk ari nya, chara kitai kesatu nambahka bomba sukarela, kedua nguna pegawai bomba bantuan ba genap iti balai (ke kurang staf),” ku iya.
Khirrudin madah munyi nya maya dirandau media pengudah tembu Pengawa Nemuai Seraya Gawa ke Balai Bomba enggau Penyah Penusah Malaysia (JBPM) Saratok kena Hari Empat.
Nangkan ke nya, Khirrudin madah iya udah nganjung perambu minta penumbuh balai bomba di Sarawak patut dikelaungka nitihka atur baka balai bomba ba mengeri besai.
Nyadi pekara nya diatu ku iya, agi ba renggat dipansik penuh lalu raban tuai balai patut pintar magi pangku pengawa ngagai raban staf ke udah bisi.
“Aku udah bisi nganjung siti surat perambu minta penumbuh balai baru di Sarawak enda ibuh bepelasarka atur tauka QR baka numbuhka balai ba mengeri besai.
“Tu laban ngira ari sukut kereban lalu kedua iya nya balai….laban ari pansik kitai enggau penyampau raban bomba ke bisi 1, 500 pansik ari sukut ‘risiko’.
“Reti nya kitai nadai perambu deka nambah penyampau raban bomba tang bepanggai ba pengelandik tuai balai enggau tuai zon mih magi lalu ngatur pengawa tauka tugas raban bomba ba balai,”ku iya.
Ba program nya, Khirrudin bisi nyuaka setipikit ngagai Pegawai Bomba Bantuan enggau Bomba Volunteer ari Rumah Panjai Tinting 2000 enggau Rumah Panjai Julius, Rumah Panjai Sungai Ruan enggau ari Kabong.
Sama bisi datai Tuai Zon 3 JBPM Sarawak Muhammad Rais Adham Rosalan, Tuai JBPM Saratok Putra Ila enggau ke bukai.-TVS
