KOTA SENTOSA, 16 Dis: Pemujur Gerempung Budaya Kadazan Dusun (KDCA) Pampang Sarawak muka opis baru nerima sukung sereta timbal positif ari bala kaban gerempung nya.
Siku Kaban KDCA Sarawak Ferderick Maldini anak Disen, 25 madah pemujur muka opis baru nya dikearapka mayuh agi aktiviti ke bekaul enggau KDCA ulih diatur dudi hari.
“Meri tabi puji ngagai KDCA laban udah mujur bulih siti opis ba endur ke chukup manah dikena bejalaika aktiviti lalu beterima kasib mega laban KDCA udah besetuju deka ngatur kelas Sape ditu (opis) udah tu,” ku iya.
Udah nya, siku agi kaban KDCA Sarawak Isabella Menon, 35 madah diri chukup gaga ati meda pemujur muka opis baru nya ngarapka budaya Kadazan Dusun terus ngerembai sereta ulih matak mayuh agi rebak baru dalam besaup ngidupka main asal sida.
Seduai iya bela mansutka buah penemu nya ngagai TVS sepengudah tembu pengawa bejadika opis baru Gerempung Budaya Kadazan Dusun (KDCA) Sarawak di Kota Sentosa, Kuching lemai kemari. -TVS
