SARATOK, 11 Dis: Sapit Menteri Pemansang Indu, Nembiak Mit enggau Pengelantang Komuniti (KPWK) Sarawak Datuk Mohd Razi Sitam madah, Palan Nginjin Mulung ke beungkus RM4.5 juta ba Kampung Dit di Debak udah dikemendar.
ku iya, projek ba baruh Ejensi Pemansang Bagi Menua Betong (BDDA) dipejalai nengah kerejasama enggau kompeni Crown Research nya begunaka taba urung 4 ekar pemesai.
“Aku udah bulih pemendar dikena ngaga siti One Stop Centre ungkup ngatur pun mulung ba Kampung Dit Debak.
“Projek tu diatu benung dalam proses nyiri penyanding penemu,” ku iya.
Iya ke mega Kaban Kunsil Nengeri (ADUN) Saribas madah munyi nya ngagai raban media pengudah bejadika Pengawa Serumpu Ke Diatur Kolej Pom Enam Saratok (KTES) ba Diwan Sri Krian lemai Hari Minggu.
Ku terang Razi, Kampung Dit dipilih nyadi Palan Nginjin Mulung berindik ari perayat ba genturung menua nya ti endang ngereja pengawa ngasilka produk ari mulung.
“Berindik ari ba menua nya (Kampung Dit) ti mayuh proses mulung ungkup mayuh guna baka pemakai jelu tupi enggau bemacham guna ke bukai,”ku iya.
Nangkan ke nya, Razi madah tambah mega bisi projek rat nanam mulung lalu nya ngujungka Kampung Dit dpilih nyadika palan besai alai nginjin mulung.
Sama bisi datai, ADUN Krian Friday Belik, ADUN Kalaka Mohd Duri, Prinsipal Kolej Pom Enam Saratok, Omar Syarif Buseri enggau ke bukai.-TVS
