SARATOK, 11 Dis: Palan Nginjin Mulung ba Kampung Dit di Debak deka disikap enggau teknologi pemadu baru ari kompeni Crown Research.
Sapit Menteri Pemansang Indu, Nembiak Mit enggau Pengelantang Komuniti (KPWK) Sarawak Datuk Mohd Razi Sitam madah, penembu projek nya ila dikearap ulih mantu nyungkak penatai pemisi raban penanam mulung di Saribas.
“Projek beungkus RM4.5 juta tu dikena ngaga siti palan alai nginjin mulung enggau produk bukai ari mulung nya empu.
“Tuju iya nya dikena mantu penanam mulung tauka pedagang repu ku orang Saribas ditu ngambi sida ulih nguna teknologi ke lebih manah dibanding sebedau tu nguna chara tradisional tauka asal,” ku iya.
Iya ke mega Kaban Kunsil Nengeri (ADUN) Saribas madah munyi nya ngagai raban media pengudah bejadika Pengawa Serumpu Ke Diatur Kolej Pom Enam Saratok (KTES) ba Diwan Sri Krian lemai Hari Minggu.
Kelimpah ari nya ku Razi, tu mega sebengkah ari projek dipejalaika dikena nyukung penumbuh Kaunsil Apong enggau Mulung sarawak.
“Kitai deka mai teknologi ke lebih manah ari Crown Research lalu ba Sarawak mega kitai udah numbuhka siti Kaunsil Apong enggau Mulung.
“Nyadi tu sebagi ari sukung ngagai ngagai raban penanam mulung,” ku iya.-TVS
