KUCHING, 29 Nov: Asil penatai pemisi Sarawak dipeda nambah berindik ari Chukai Jual Nengeri (SST) ti dipejalaika ngaul produk petroleum ti diteritka dalam taun 2019 sereta meri asil penyampau RM14.7 bilion nyentuk ke bulan Oktober 2023 enggau purata urung RM3.5 bilion setaun.
Sapit Premier Sarawak, Datuk Amar Douglas Uggah Embas madahka, perintah Sarawak terus ransing dalam ngemanahka penuduk fiskal nengeri tu seraya nyukung momentum penumbuh sereta nambahka finansial tauka belanja timpuh panjai enggau pengulih beterus nengeri.
“Ari asil tu udah nyadi sebagi ari pemansut asil besai laban ulih meri kurang lebih 33 peratus ngagai asil penatai pemisi nengeri.
“Kitai mega ngemataka DUN Sarawak udah ngemendarka RUU Rampa Menua (Ngurangka Pemansut Gis Rumah Gadung) 2023 sereta RUU baru tu deka muka peluang ngagai Sarawak nguna manah asil penatai pemisi baru ti tau nambahka fleksibiliti fiskal kitai dalam ngatur agenda pemansang ekonomi, nyerangkung inisiatif ubah klimet,” ku iya madah.
Iya mansutka jaku nya rambau sesyen nyimpul jurai dalam Aum Hari ke-8 Kunsil Nengeri (DUN) Sarawak lebuh Hari Tiga.
Berebak enggau nya, Uggah ke mega Menteri Pekara Wang enggau Ekonomi Baru Kedua Sarawak nerangka, opis menteri iya deka terus negapka chara ngatur asil penatai pemisi Sarawak, mekuhka pengawa ngatur ke lebih efisyen dalam bidang ti ulih ngemudahka pengawa ngasilka enggau ngumpul asil ti meri penguntung dalam bidang digital, neritka atur ke lebih besai ba pengawa ngumpul asil, ngurangka tiris asil, sereta bedajaka budaya ti tegap ari sukut akauntabiliti enggau transparensi dalam finansial mensia mayuh.
Udah nya, Uggah ke mega Kaban Kunsil Nengeri (ADUN) Bukit Saban madahka perintah Sarawak deka terus nerenak pengelati ngatur belanja enggau akauntabiliti dalam pengawa ngatur puncha asil penatai pemisi nengeri.
“Perintah Sarawak nengah kerejasama enggau Bank Dunya benung bejalaika inisiatif mansik baru langkar kereja turan enggau matau Badan Statutori enggau Serikat Bekaul Perintah ke udah bisi.
“Kerejasama antara perintah Sarawak enggau Bank Dunya dalam ngubah dinamik operasyen Serikat Bekaul enggau Perintah (SOE) nyadi siti agi pemujur dalam urus perintah korporat sereta tengkilun ti strategik,” tandu iya.
Tambah iya, inisiatif ti dipejalaika ukai semina nambahka jalai kereja kemaya hari aja, tang mega mekuhka kuing tuju numbuhka SOE ti nyikap diri napi pengidup dudi hari, lurus sereta ngemeranka tangkup pengawa ti nentuka nya bisi daya ngemujurka juluk sosio-ekonomi Sarawak nengah bungkur ke lebih besai. – TVS
