KUCHING, 26 Nov: Bajet Sarawak 2024 ke dibantai Premier Sarawak Datuk Patinggi Abang Johari Tun Openg ba hari keterubah Aum Kunsil Nengeri (DUN) empai lama diperati siti bajet ti inklusif ungkup dikena ngerapatka pemansang di kandang menua pesisir enggau mengeri.
Kaban Kunsil Nengeri (ADUN) Kalaka Mohd Duri madah, nengah bajet nya dia sepenyampau 66 peratus ari penyampau agih belanja nya diungkupka dikena ngatur pemansang di menua pesisir.
“Siti bajet ke pemadu inklusif dibantaika Yang Amat Berhormat Premier lalu ba Bajet (Sarawak) 2024 tu bisi 66 peratus dikena ngatur pemansang ba menua pesisir ngambi ulih sama mansang sama baka di menggeri,” ku iya.
Iya madah munyi nya maya dirandau pengari TVS ba Begunan Kunsil Nengeri Sarawak (DUN) lebuh Hari Empat.
Nangkan ke nya, Mohd Duri meri besai ,meransang semua peranak ari sitak Kalaka ke diau ba dedini endur anang enda nguji ngambi bagi ari bajet ke bisi disediaka perintah.
“Kitai meri terima kasih ngagai Yang Amat Berhormat Premier Sarawak laban udah meri bantu dikena bejalaika sosio ekonomi ungkup perayat ba Kalaka.
“Saran aku ngagai bala di Kalaka enda ngira dini alai, rebut mih peluang tu nitih sektor dikerindu diri baka betanam betupi, pengawa dagang nyadi kunteriktor enggau ke bukai,” ku iya.-TVS
