SARATOK, 16 Nov: Kaban Kunsil Nengeri (ADUN) Krian Friday Belik ngelalau semua gerempung ukai dikuasa perintah (NGO) nyengkaum Komiti Pemansang enggau Pengelikun Genturung Pendiau (JKKK) ari 245 buah rumah panjai di sitak Kunsil Nengeri (DUN) Krian sereta serakup indu tauka kelab anang sanggu minta geran ari Projek Mit Pemansang Menua Pesisir (MRP).
Ku iya, naka tu urung RM1.2 juta geran MRP DUN Krian udah disuaka ngagai bala penerima nyengkaum ungkup 44 penerima ngarika 11 JKKK, 6 Gerempung Indu, 9 PIBG, 17 serakup tauka kelab enggau sebuah gerija ke manggai 372, 500 ringgit diberi ba renggat ketiga.
Nya alai, ku Friday surat peminta ari genap rumah panjai chukup beguna nyadika rikod disimpan ba opis servis pengari rayat, bukti penungga agih belanja ke udah disadung.
“Kebuah begunaka surat begunaka peminta ari tiap-tiap rumah panjai ari gerempung tauka bala biro.
“Nya deka nyadika bukti disimpan kami ba palan servis dikena kami madah kini tuju agih belanja ke diberi ngagai siku-siku pengari rayat.
“Enti nadai peminta ari kita, tauka nadai surat dia kami enda ulih meri bukti kini penunga kami meri agih belanja nya tadi,” ku iya.
Iya bejaku munyi nya ba mua mayuh lebuh nyuaka chek geran Projek Mit Pemansang Menua Pesisir (MRP) ngagai 44 pengari penerima ba Saratok diatur ba Diwan Mayuh Guna Opis Pelilih Saratok, kemari.-TVS
