KUALA LUMPUR, 3 Nov: Semina bujang dara tauka bujara ke ada 2007 deka dikangau bejalaika servis Program Latih Ke Menua Enggau Bansa (PLKN) nyema program nya berengkah 2024.
Opis Menteri Penyaga Menua (MINDEF) nengah sebengkah penerang madah pelatih deka dipilih nitihka taun ada ungkup PLKN 3.0.
“Sechara prinsip, perintah udah setuju bejalaika baru PLKN nengah chara ke baru PLKN 3.0 seriris enggau Akta Latihan Khidmat Negara 2003 (Akta 628).
“Ambika chunto, nyema PLKN 3.0 dipejalaika ba taun 2024, nyadi bujara ke semina ada ba taun 2007 aja deka dikangai bejalaika latih nya,” ku penerang nya.
Ba penerang nya mega madah nyema sida enda ulih nyereta PLKN ketegal kebuah ti dikemendar, nyadi sida ulih minta ditangguh.
“Tatak maksimum nyadi pelatih iya nya nyentuk umur 35 taun. Mindef ngarap penerang nya ulih mutarka pengirau runding mensia mayuh senentang penetap taga umur pelatih PLKN 3.0,” ku tandu penerang nya.
Kena bulan Oktober tu tadi, perintah setuju neruska baru PLKN ti dipadam 2018 ngena chara latih bebida enggau sebedau tu, laban bala nembiak deka bejalaika latih ba Kem Soldadu.
Menteri Penyaga Menua Datuk Seri Mohamad Hasan bepelasarka ripot berita madahka bisi 13 Kem Soldadu Wataniah deka dikena endur bejalaika latih pengelama 45 hari ke ulih muat nyentuk 4,000 iku pelatih.-TVS
