ROBAN, 3 Nov: Kaban Kaunsil Nengeri (ADUN) Krian Friday Belik madah perambu deka numbuhka siti peresa dikena nganti Tes Peresa Sekula Primari (UPSR) manah sereta engkeman.
Ku iya, nengah pemisi peresa baka nya ila ulih dikena nyarap ikas pemandai siku-siku nembiak sebedau sida nampung pelajar ngagai sekula sekondari.
“Ba penemu aku kediri aku endang setuju ke penemu nya laban nya siti chara dikena kitai nyarap bala nembiak ba peringkat keterubah.
“Enti kitai beratika kenyau ari suba peresa dikumbai kitai baka ‘common entrance’ sebedau UPSR kitai meda kualiti pelajar ulih disarap kitai ba renggat tumu.
“Nyadi, dia kitai ulih ngatur perambu nama utai ke patut dikereja tauka patut diadu dikena kitai ngemujurka agi ungkup nembiak ke agi kurang pengelandik tauka pemandai,” ku iya.
Friday madah munyi nya lebuh dipinta meri timbal bekaul enggau perambu perintah Sarawak ti deka numbuhka peresa kediri nganti UPSR baka ke udah dipansutka Menteri Pelajar, Inovasyen Enggau Pemansang Bakat, Datuk Seri Roland Sagah Wee Inn sepengudah tembu Pengawa Miring Ungkup Pesta Roban 2023 ditu, kemari.
Nambah nya ku Friday, iya mega ngarapka tuju penumbuh peresa nya ila ukai dikena ningkil tauka muai siku-siku nembiak tang dikena sida nyikap diri napi ikas pelajar ke lebih tinggi.
“Nya alai enti utai tu ulih diaduka kitai Nengeri Sarawak ditu kiraka bisi pemanah tang siti utai deka diperatika kitai iya nya kitai deka meda anak uchu kitai nya bisi peluang niki lalu terus belajar ngagai peringkat ke tinggi agi,” ku terang iya.-TVS
