ROBAN, 3 Nov: Atur penyikap ke udah digaga raban komiti pengatur Pesta Roban 2023 nerima puji ari Friday Belik.
Kaban Kunsil Nengeri (ADUN) Krian madah tu terang mandang ke pengagit enggau komitmen sereta kualiti kereja ti tingi udah dikereja raban komiti pengatur Pesta Roban 2023 betuaika Pegawai Nguasa Pelilih Mit Roban (SAO) Steve Miller Nuas endang chukup manah.
“Penyikap ngatur Pesta Roban tu tau dikumbai kitai udah ba renggat kepenudi.
“Nya alai ari perati penuh aku ke mega Penyanding Penemu Pesta Roban berasai tepantup ati meda utai ke udah diadu bala Komiti Pengatur betuaika SAO Steve Miller ke mega Penguasa Pelilih Mit Roban,” ku iya.
Friday madah munyi nya lebuh dirandau TVS pengudah tembu pengawa miring nyadika pemungkal Pesta Roban ke berengkah sehari tu.
Nengah peluang nya mega Friday muji pengeregas enggau kerejasama dibantaika bala Tuai Raban Bansa (KMKK) enggau bala Tuai Rumah (TR) di Roban dalam ngemujurka Pesta Roban 2023 ti chukup manah.
“Aku rindu endar meda kerejasama entara semua tuai raban bansa enggau tuai-tuai rumah iyaka bekelingi pendiau enggau kitai di Roban ditu.
“Semua diperati aku chukup bekerejasama ngereja pengawa dikena nyikap Pesta Roban tu.
“Aku meda sida iya bela gagit, regas deka meda Pesta Roban tu mujur diadu,” ku iya.
Ungkup penemu entara penanyi tebilang Iban ke bisi merindang sepanjai timpuh Pesta Roban 2023 tu iya nya Lucy M, Rickie Andrewson, Angela Lata Jua, Linda Simai, Florence Lo enggau Phoebe Chloe.
Sama bisi datai Sapit Residen Betong Mahra Salleh, Pegawai Nguasa Pelilih Mit Roban (SAO) ke mega Chairman Pesta Roban 2023 Steve Miller Nuas, Bala Tuai Raban Bansa (KMKK) Pelilih Mit Roban enggau ke bukai.-TVS
