SARATOK, 2 Nov: Pemayuh ejensi perintah ke sama bisi ngambi bagi ba Program Outreach dikumbai Wai FM Datai Nemuai enggau Agricorp mandang ke komitmen dalam ngerembaika berita sereta informasyen beguna ngagai rayat menua pesisir.
Kaban Kunsil Nengeri (ADUN) Krian Friday Belik madah, tu mega siti kelai kerejasama tegut entara genap ejensi perintah ke bisi di Saratok.
“Ari pemayuh penyampau agensi perintah ke enggau kitai ngatur Program AgriCorp enggau WaiFM Datai Nemuai tu nunjuk ke kerejasama entara opis-opis perintah, ejensi perintah ba Saratok ditu.
“Tu kerejasama ke chukup manah lebih agi enggau tuju ke sama iya nyua deka ngerembaika berita manah ngagai rayat ba menua pesisir tauka rumah panjai,” ku iya.
Friday mansutka pekara nya ngagai pengari TVS pengudah tembu aum kepenudi komiti pengatur Program Agricorp Wai FM Datai Nemuai ke Rumah Panjai Mendas Asal, ensana.
Pia mega ku Friday, arapka pengani ari rumah panjai ke besemak sama sampal datai ngulu program tu.
“Urung 2,000 disadang datai laban udah dikangau nengah surat mungkur empat buah rumah panjai ke ngelinggi,” ku iya.
Ungkup penerang, entara ejensi perintah ke bisi ngambi bagi ba Program Waifm Datai Nemuai kena 3 ngagai 4 November tu iya nya JKR, Kaunsil Pelilih Saratok, PDRM, Saratok, Opis Nembiak Lumba enggau Main Bagi Betong, Opis Pemadah, Bomba, Kemas, Rela, JPAM enggau JKM.-TVS
