DEBAK, 31 Okt: Bank Pertanian Malaysia Berhad (Agrobank) merambu deka muka pampang baru bank nya di pelilih Debak udah tu.
Direktor Agro Bank Wilayah Sarawak, Abdul Halek Abdullah madah, perambu muka pampang baru nya beguna, berindik ari peminta guna mensia mayuh ti deka ngulihka servis bank lebih agi ngaul pekara ngatur wang.
“Kitai deka meda dulu baka ni gaya ba Debak ditu lalu ba awak ti sama perambu kitai iya nya deka muka siti agi pampang ditu ila laban diatu orang nguna lalu muka akaun pan udah mayuh ba Debak ditu.
“Nyadi perambu kitai udah tu di Debak tu keterubah kitai deka muka siti kaunter ungkup muka akaun enggau alai minjau duit kelimpah palan betanya bekaul enggau Agrobank ditu,” ku iya.
Iya madah baka nya lebuh dirandau TVS pengudah tembu pengawa bejadika Mesin ATM Agro Bank di Debak ke dipenyadika Sapit Menteri Pemansang Orang Indu, Anak Mit enggau Komuniti Sarawak, Datuk Mohd Razi Sitam apin lama ke udah.
Berebak, Abdul Malek mega beterima kasih ngagai perintah nengeri Sarawak lebih agi Kaban Kaunsil Nengeri (ADUN) Saribas laban udah ngemujurka penumbuh mesin ATM keterubah Agro Bank di Debak.
“Tu iya nya kerejasama entara Agrobank begulai enggau Bank Negara sereta Perintah Sarawak nengah YB Datuk ba sitak Debak ditu kitai mujur numbuhka siti mesin ATM Agrobank terubah di Debak taun tu,” ku iya.
Ungkup penemu, mesin ATM Agrobank tu iya ti keterubah ditumbuhka di Debak enggau pampang baru ti ke-55 ba serata Sarawak.-TVS
