SARATOK, 31 Okt: Pesta Roban 2023 ke diatur berengkah 3 ngagai 12 November tu deka dirichahka enggau penatai sekeda penanyi tebilang Iban.
Chairman Pesta Roban 2023, Steve Miller Nuas madahka, pengerami serak tu ulih matak lebih mayuh temuai ari ke udah nengah bemacham aktiviti enggau program ke diatur.
Ku Steve, antara 10 iku penanyi tebilang Iban ke disadang bisi datai merindang maya pengerami tu ila iya nya Lucy M, Rickie Andrewson, Angela Lata Jua, Linda Simai enggau ke bukai.
“Kitai bisi 10 iku artis lokal naka tu sekeda ari sida tu iya nendang udah ditemu landik belagu sereta tebilang bala Lucy M, Angela Lata Jua, Rickie Andrewson Ngalai, Bibi Linda enggau ke bukai,” ku iya.
Steve ke mega Penulung Pegawai Opis Pelilih Mit Roban madah munyi nya maya dirandau TVS lebuh nyempulang pejalai Kaban Kunsil Nengeri (ADUN) Krian Friday Belik ba Program Pengari Begulai enggau Rayat ba Rumah Tugau Jalin Di Brayang Kemuntang, kemari.
Ku tandu iya, penyelai Pesta Roban serak tu bisi diselitka Pekit Batak Lampung ba atas ai nguna perau ti keterubah iya diatur di Roban.
“Penyelai dikembuan Pesta Roban serak tu ke nadai kala diatur ba alai bukai sebedau tu iya nya batak lampung atas ai ngena perau lalu iya besai endar iya nya replika rumah panjai asal Iban,” ku iya.
Ungkup penerang, entara aktiviti bukai ke bisi diatur ba sepanjai timpuh pengerami Pesta Roban nya ila iya nya pekit karaoke, lumba rayat, pekit mansuh tiga serumpun, eksibisyen, pekit nyumpit enggau ke bukai.-TVS
