SARATOK, 30 Okt: Projek Ngaga Jematan Pemintas dikena ngelayang jalai Pan Borneo ba Sekula Primari (SK) Brayang udah dikemendar.
Kaban Kaunsil Nengeri (ADUN) Krian Friday Belik madah, penembu Projek Jematan Pemintas nya ila dikearapka ulih mutar penanggul pengelikun jalai alun ditapi mensia mayuh di Brayang lebih agi bala apai indai enggau nembiak sekula ba SK Brayang.
“Enti nitihka pelin sida ke nyadi Kunteriktor Pan Borneo siti ari alai ke udah ditaga tauka dikemendarka ngaga jematan pemintas dikena ngelayang ari jalai sepiak tu ngagai sepiak nya tadi ba SK Brayang endang udah bisi dalam pelin.
“Nya alai, ngarapka utai nya ulih digaga enggau jampat,” ku iya.
Friday madah munyi nya pengudah tembu Program Begulai enggau Rayat ba Rumah Tugau Jalin Brayang Kemuntang Seblak Roban, pagi tadi.
Nangkan ke nya ku Friday perambu deka ngaga jematan pemintas ba Simpang Sungai Brangan diatu benung dalam perambu sereta deka dibai iya ngagai raban ke bekaul.
“Kitai deka beratika ba senentang ni iya ke bisi tau alai kitai ngaga jematan pemintas.
“Ba runding aku iya nya ba area Simpang Sungai Brangan dia laban nya pan alai mensia mayuh ngelayang ke seberai lebih agi bala apai indai enggau nembiak sekula ti deka mansang ke sekula tauka pulai ngambi anak sekula ba SMK Saratok.
“Kitai sama nemu jalai nya chukup dedat ba senentang area dia.
“Nya alai nya siti endur ke udah dikelala lalu aku deka mai utai tu ke atas agi awakka peminta nya ulih Pan Borneo empu,” ku tandu iya.
Dulu ari nya, mua ke pagi Friday bisi limpang nyereta pengawa miring ngelasi menua ba adan entara Menua Bagi Betong enggau Sarikei ba kayu malam ke suah endur penusah aksiden nyentuk kala naban ke nyawa mensia.-TVS
