BINTULU, 21 Okt: Pengawa Bepilih Mit (PRK) Kunsil Nengeri (DUN) Jepak ngemataka tiga iku chalun deka berebutka menalan iya nya chalun ari Gabungan Parti Sarawak (GPS), Parti Bumi Kenyalang (PBK) enggau Parti Aspirasi Rakyat (Aspirasi).
Semua chalun tu udah dituku ke bediri minta pilih nengah Pegawai Menijar Pengawa Bepilih PRK DUN Jepak, Abang Zainuddin Abang Turkey.
“Aku udah meresa keretas-kereta nama chalun enggau udah tembu diperesa, aku tepantup ati netappka nadai ditulak kereta nama chalun nya,” ku iya.
Abang Zainuddin ngenukuka pekara nya pengudah tembu pengawa nganjung nama chalun ungkup PRK DUN Jepak ke diatur Diwan Suarah Bintulu ditu pagi tadi.
GPS diarika ex-Direktor Ejensi Antidadah Nasional (AADK) Sarawak, Iskandar Turkee.
Udah nya, PBK agi deka nguji ngerampas penuduk DUN Jepak, entaruhka chalun sebedau tu ke kala bediri minta pilih maya Pengawa Bepilih Besai Nengeri (PRN) Sarawak ke-12, Stevenson Joseph Sumbang, lalu Aspirasi diarika Chieng Lea Phing.
Nadai palan undi tumu dibuka ungkup PRK tu lalu semua 43 pengundi tumu berejister mungkur raban Polis deka ngundi ngena sistem undi pos lalu Hari Ngundi ditetapka kena 4 November ila ngaul 22,761 pengundi.
PRK DUN Jepak diatur beduduk ari pemidang penyandang iya Datuk Talib Zilpilip kena 15 September tu tadi, lalu iya megai penuduk tu kenyau ari DUN Jepak ditumbuh pengudah adan baru dibantai ungkup PRN Sarawak ketujuh ba taun 1996.
Ba PRN Sarawak 2021, penuduk DUN Jepak ngemataka empat chalun belaban ngemataka niang Datuk Talib menang majoriti 4,243 undi ngalahka chalun ari Parti Sarawak Bersatu (PSB), PBK enggau chalun Independent.-TVS
