BETONG, 19 Okt: Tiga bengkah Klinik Pengerai ba bagi menua Betong diatu udah bisi servis tauka disikap enggau vaksin rabies.
Pegawai Opis Pengerai Bagi Betong Dr Mohamad Norhaizan Ahmad madah, tiga buah klinik tu iya nya Klinik Pengerai Mid Layar, Klinik Pengerai Debak enggau Klinik Pengerai Kabong.
“Ba Bagi Betong kitai udah nambah beberapa buah klinik baru ke ulih alai betuchuk vaksin rabies iya nya Klinik Pengerai Mid Layar, Klinik Pengerai Debak enggau Klinik Pengerai Kabong lalu penyampau tu deka ditambah dudi hari ila ngambika semua klinik kitai ditu (Betong) ngembuan perengkaguna dikena betuchuk vaksin rabies,” ku iya.
Iya madah munyi nya pengudah ngulu Program Outreach UPU2u 2023 diatur Opis Pelajar Tingi (KPT) ba Diwan Lumba Tan Sri Datuk Amar Stephen Kalong Ningkan ditu, kemari.
Nangkan ke nya, Dr Mohamad bela bekunsi ke tiga chara dikena nyeliah diri ari kena rampit igi penyakit rabies.
“Dikena nyeliahka diri ari kena rampit rabies tu tiga bengkah pekara aja deka dikunsi aku enggau mensia mayuh lebih agi di Betong ditu.
“Kesatu seliahka ari kena ketup tauka keramak ukui tauka mayau tauka sebarang jelu ke tau ngasuh kitai kena rampit rabies.
“Kedua enti udah kena ketup tauka keramak mesti dibasu sepengelama 15 minit ngena sabun lalu ketiga enda tau enda diperubat lengkas ba Klinik tauka Sepital besemak.
“Tu beguna amat ngambika sida ke kena ketup ulih dituchuk vaksin rabies enggau nyeliahka diri ari kena rampit rabies mensia,” ku iya.
Ungkup penemu, naka tu lebih 90 buah klinik pengerai di selampur Sarawak bisi bejalaika pengawa meri vaksin rabies (post bite clinic).-TVS
