SARATOK, 1 Okt: Rayat di menua tu lebih agi di Saratok diperansang terus bekerejasama sereta ngetanka penyerakup pupu bansa ungkup pemaik menua.
Kaban Kunsil Nengeri (ADUN) Krian Friday Belik madah, pengawa ngetanka penyerakup pupu bansa beguna bendar ngambika perintah nyamai ngemujurka pemansang ke udah dilanggur.
“Kitai di Sarawak berasai betuah laban ulih idup segulai sejalai enggau pangan diri enda ngira bansa.
“Pemisi kerejasama taja enda sama budaya enggau pengarap, semua nya nadai nanggul kitai begulai enggau pangan diri.
“Nya alai, pekara tu mih mestit ditanka kitai lalu patut diteruska dikena nentu ke perintah menua meruan tegap,” ku iya.
Friday mansutka penemu nya maya Program Ngintu Hari Malaysia Renggat Pelilih Saratok ba Panggau Besai Sri Kalaka ditu, kemari
Ari kaul ke manah ku iya, dia perintah nyadi tegap sereta tentu nyamai bala ketuai ngatur pemansang.
“Enti perintah tegap, dia ekonomi pan tegap lalu nyamai alai rayat merambu pekara bekaul enggau pemansang.
“Udah nya tentu nyamai mega bulih pengawa sereta milih bagi pengawa ke deka dikereja diri dikena nambah penatai pemisi lalu tu mih berekat buah merdeka diasaika kitai ngelama tu,” ku iya.
Ngelansa pasal program sehari nya, bisi 20 buah kontinjen bisi ngambi bagi ba pengawa bejalai bebala mayuh beserimbai enggau Program Ngintu Hari Malaysia Renggat Pelilih Saratok 2023 diatur Gerempung Veteran Raban Soldadu Malaysia (PVATM) Pampang Saratok.-TVS
