LAWAS, 30 Sept: Gabungan Parti Sarawak (GPS) deka nganjung chalun ari Parti Pesaka Bumiputera Bersatu (PBB) ba Pengawa Bepilih Mit (PRK) Kunsil Nengeri (DUN) Jepak kena 4 November tu ila.
Mandal Presiden Kanan PBB, Datuk Amar Awang Tengah Ali Hasan ngarapka bala pengundi di DUN Jepak terus meri sukung penuh ngagai chalun sida maya ila.
“SPR udah nentuka maya nganjung chalun, maya ngundi lalu GPS deka ngirai chalun.
“Nyadi tentu aku ngarapka, bala pengundi terus meri sukung dikena nentuka pemujur besai enggau neruska pengawa pemansang ba sitak nya enggau nengeri Sarawak empu,” ku iya.
Awang Tengah ke mega Sapit Premier Sarawak mansutka pekara nya pengudah Program Bejadika Nembiak Lawas Excellent (BLX) Lawas Liga 2023 Tetutup Lawas ba Padang Dataran Lawas, pagi tadi.
Berebak enggau nya, Awang Tengah madah Sarawak deka nulak ulah politik ti ngerembaika petenah enggau pemenchi.
“Ya kitai sigi enggai mih politik petenah ti pengujung iya mai penyarut.
“Nama utai ke deka disaran politik kitai iya nya politik ke ngemeratka penegap laban ari penegap nya kitai ulih nyaran ngagai pengawa ke mai pemansang.
“Iya ke beguna iya nya baka ni kitai ulih besaup tulang nambahka pengelantang pengidup komuniti.
“Kitai mega ngembuan juluk ke tinggi nengah PCDS 2030 dikena nempa nengeri tu nyadi sebuah nengeri maju enggau ngembuan penatai pemisi tinggi,” ku terang iya.
Ungkup penemu, PRK DUN Jepak diatur beduduk ari pemidang penyandang iya Datuk Talib Zulpilip kena 15 September tu tadi.
Komiti Pengawa Bepilih Besai (SPR) netapka timpuh kimpin ungkup PRK nya pengelama 14 hari sepengudah nama-nama chalun ke bediri minta pilih dibantai kena 21 Oktober nyentuk pukul 11.59 malam, 3 November ila.-TVS
