KUCHING, 24 Sept: Premier Sarawak, Datuk Patinggi Tan Sri Abang Johari Tun Openg nyemetak madahka, pengawa ditegika Sarawak iya nya bepelasarka ngagai empat dokumen ti nyadi pugu pekara berat dikena mulaika hak enggau pemaik Sarawak.
Ku terang iya, dokumen tu iya nya Kunstitusyen Malaysia, Kunstitusyen Sarawak, Sempekat Malaysia 1963 (MA63) enggau Ripot Komiti Cobbold.
“Parti kitai bepelasarka empat iti tu. Pengawa ditegika kitai dalam Sarawak iya nya bepelasarka ngagai empat, nadai lebih nadai kurang.
“Siti nya, Kunstitusyen Malaysia nya bechura oren. Sigi ke bechura biru, Kunstitusyen Sarawak, sigi bechura chelum, Sempekat Malaysia, sigi agi bechura PBB, mirah nya Ripot Komiti Cobbold. Empat igi tu,” ku iya.
Abang Johari mansutka jaku nya maya Konvensyen Khas PBB Sarawak 2023 Zon Kuching, di Hikmah Exchange, ditu kemari.
Nerang silik, Abang Johari ke mega Presiden Parti Pesaka Bumi Putera Bersatu (PBB) madah, Kaunsil Tuai PBB patut neruska pengawa nagih hak enggau pemaik Sarawak nengah penerang ke udah bisi.
“Parti kitai PBB, kitai ngetanka hak kitai ukai ketegal kitai ngembuan semangat menua kediri, enda.
“Kitai bemalinka ngagai empat dokumen tu, enda lebih enda kurang. Nyadi tuai PBB patut negika pekara ke bisi,” ku iya.-TVS
