SIBU, 22 Sept: Dibah anak Ngik tauka Gloria Dibah, 40 diatu berasai temegah pengudah mujur muka palan dagang penganta kediri empu diberi nama Gloria Beauty Centre bepalan ba Sibu.
Lebuh mulaika pengingat baka ni iya ulih tepejuh ngagai pengawa dagang bidang penganta diri, dia Gloria madahka, semua nya bepun ari pendiau diri ke kurang bepengerai sebedau tu sereta suah ngelawa palan beurut.
“Aku belabuh minat bidang tu (penganta) laban suba berindik ari aku suah amat enda dapat (sakit).
“Dia aku selalu ngelawa spa, beurut, pia mega bagas ngelawa salon ngadu buk, nuchi mua semua nya pengujung iya nyau nyadi minat.
“Aku berati semua nya ulih nyadika pun penatai pemisi nyadi ari nya aku lalu belabuh belajar sereta mupuk nyereta bemacham kus dikena nambahka penemu diri,”ku terang iya.
Gloria ke mega peranak asal Bintulu madah munyi nya lebuh dirandau TVS ba palan dagang iya empu di Jalai Wawasan, ditu empai lama.
Nangkan ke nya ku Gloria, terubah suba iya semina ulih bejalai ke pengawa dagang nya ari rumah tauka Mobile Spa aja tang diatu juluk iya deka ngerembaika dagang nya udah nyadi nyata bekau ari pemujur muka premis dagang penganta dipenggi diri empu di Sibu.
“Terubah suba aku ngaga ba rumah (Home Base).
“Udah nya aku ngaga Mobile Spa aku bejalai dini penguna deka nguna aku nitihka peminta sida.
“Kelimpah ari nya, aku mega semampai ngemanahka servis diri baka nyereta bemacham kus.
“Pengujung iya semua penemu ke dipelajar nya digempuru lalu diatu aku udah mujur bejadika palan dagang diri empu kena 28 Ogos tu tadi di Sibu,” ku iya.
Ungkup penemu, entara servis ke bisi disedia ngagai mensia mayuh ba Gloria Beauty Centre iya nya ‘eyelasahes extension, facial, footcare’, beurut, ngechuk buk enggau mua, sewa pekayan pengantin enggau ke bukai.-TVS
