KUCHING, 17 Sept: Premier Sarawak, Datuk Patinggi Tan Sri Abang Johari Tun Openg ngelalau rayat di menua tu ngambi enda betalatka haribulan menua merdeka sekalika kena 31 Ogos 1957 enggau 16 September 1963.
Tang ku iya, pekara ke patut diberi perati iya nya pengawa ngempung wilayah enggau bansa.
“Ba penemu aku, enda ibuh mih kitai lama betalatka pasal haribulan-haribulan tu tang patut meri perati ngagai pengawa ngempung wilayah-wilayah enggau ngempung bansa kelimpah nentuka pemansang dipejalaika sebela ba genap wilayah.
“Pengerami Hari Malaysia patut ngerak semua rayat Malaysia iya nya tanah Malaysia tu bisi ari Kangar (Perlis) nyentuk ke Kuching (Sarawak) enggau terus ke Kota Kinabalu (Sabah) ba Timur,” ku iya.
Abang Johari mansutka jaku nya rambau Pengerami Ngintu Hari Malaysia 2023 Renggat Nasional ba Stadium Perpaduan, ditu malam tadi.
Lebuh nerang silik, Abang Johari madah, Malaysia nyadi kena 16 September 1963, lalu Tanah Melayu merdeka kena 31 Ogos 1957, iya nya enam taun tumu agi ari penumbuh Malaysia.
Berindik ari nya, ku iya 16 September mega sama besai reti enggau 31 Ogos laban kededua haribulan nya bela bekait ti ngujungka penyadi menua Malaysia.-TVS
