ENGKILILI, 15 Sept: Urung 184 penyereta mungkur raban staf enggau nembiak Sekula Primari (SK) Engkilili No. 1 bisi ngambi bagi ngemujurka Program Bejalai Bebala Mayuh nyerumba Hari Malaysia Ke-60 Taun Renggat Sekula 2023.
Kepala Pengajar SK Engkilili No.1 Andrew Achan Ubam madah tuju sida ngatur program nya ngambika semua staf enggau raban nembiak ba sekula nya sama bepeluang belematika pemujur pengawa ke udah digaga raban ketuai dulu suba dalam ngulihka menua merdeka.
“Nengah program tu mega dikearapka ulih nerenak semangat patriotisme ba raban nembiak.
“Nya alai, aku ngarika semua raban SK Engkilili No.1 meri Selamat Hari Malaysia ngagai semua rayat Malaysia.
“Ngarapka menua Malaysia ke disayau kitai terus likun, dilindung Tuhan sereta diseliah ari sebarang penusah. Selamat Hari Malaysia,” ku iya.
Pengajar Andrew mansutka jaku nya maya Program Bejalai Bebala Mayuh nyerumba Hari Malaysia diatur SK Engkilili No.1 ba Pasar Engkilili, pagi tadi.
Ungkup penemu, pengawa bejalai bebala mayuh tu berengkah pukul 7.00 pagi ari SK Engkilili No.1 ngelinggi Pasar Engkilili lalu tembu ba Balai Polis Engkilili.
Aktiviti bukai ke bela bisi diatur baka ‘Deklamasi Sajak’, pengawa nyura enggau nyadaka lagu-lagu patriotik.
Sama bisi nyereta program tu, bala Pegawai Penyambung Sekula (PPS), Penulung Kanan 1 SK Engkilili No.1 Ali Endeng, Penulung Kanan Pekara Nembiak (HEM) Victoria Tikong, Penulung Kanan Kurikulum Douglas Patan enggau pengajar ke bukai.-TVS
