SARATOK, 14 Sept: Sekumbang menua Malaysia udah ditumbuh mayuh pemansang udah dipejalaika perintah baik nya nengah Perintah Besai tauka Perintah Nengeri Sarawak.
Taja pia ku Kaban Kunsil Nengeri (ADUN) Krian Friday Belik madah, semua nya patut ditambahka agi udah tu ngambika rayat Sarawak lebih agi sida ke diau mendam ba menua pesisir ulih sama ngasai ke buah merdeka.
“Sekumbang udah merdeka sereta begulai dalam serakup Malaysia asai sepi aku kitai di Sarawak ditu taja pan udah jauh mansang ari ke udah-udah tang ari segi infrastruktur pemun semua nya udah bisi magang.
“Tang utai ti patut dikira dipeda kitai diatu iya nya kitai deka ngemanah ke agi perengka ke enda tentu chukup tauka apin manah ba menua pesisir,” ku iya.
Iya mansutka penemu nya lebuh dirandau TVS ba sebengkah pengawa diatur ba Saratok empai lama.
Ku terang Friday, agi mayuh pemansang patut diaduka perintah udah tu lebih agi pemansang infrastruktur tauka iya ke bekaul enggau sosio ekonomi rayat.
“Ari segi infrastruktur taja jalai udah menyana tang agi mayuh utai ke ulih adu ke kitai baka ngaga jalai baru, ngemanahka pekara pelajar baka begunan sekula, klinik enggau ke bukai dibaruh iring Perintah Madani.
“Kitai ngarap ke perintah agi majak meri pemansang dikena nyungka pengidup kitai di Sarawak ditu lebih agi di Krian,” ku iya.
Beserimbai enggau Hari Malaysia, Friday meri terima kasih besai ngagai Perintah Penyerakup enggau Perintah Sarawak laban udah bebendar ngatur pemansang di Sarawak lebih agi ba Krian.
“Laban ke nyadi rayat Malaysia kitai beterima kasih ngagai perintah lalu ngarap ke perintah agi meruan berati ke utai ke apin chukup ba kitai di menua Sarawak ditu lebih agi ba menua pesisir baka kitai di Saratok enggau Krian ditu,”ku iya.-TVS
