SARATOK, 12 Sept: Urung 3,000 rayat ditu bela gagit nganti penatai Yang di-Pertuan Agong Al-Sultan Abdullah Ri’ayatuddin Al-Mustafa Billah Shah ba Simpang Saratok.
Kaban Kunsil Nengeri (ADUN) Krian Friday Belik madah, iya enda ngadang ke penatai rayat ngemayuh nya laban pengawa penyikap ngambat Agong di menua nya diatur ngenyit.
“Nyadi program tu kebendar iya ngenyit laban semina kemari sida ari Opis Pelilih begulai enggau bala bukai ngadu program begerah ke mensia mayuh tang taja pia ari segi penatai bala kitai sehari ke tu chukup mayuh chukup rami,” ku iya maya dirandau TVS lemai tadi.
Ku tandu Friday, penatai rayat ngemayuh nya nganti ba Simpang Saratok kelai penaluk rayat deka betemu enggau Agong.
“Kitai sama nemu, Agong tu ketuai ke pemadu atas nyadi lambang megai menua kitai Malaysia, nyadi pengawa rayat ti ngambat iya kelai penaluk rayat ngagai Agong,” ku iya.
Ungkup penemu, program ngambat penatai Agong di Simpang Saratok lemai tadi diatur Palan Servis ADUN Krian begulai enggau Opis Pelilih Saratok sereta Opis Pemadah Pampang Saratok.
Sama bisi datai, Pegawai Pelilih (D.O) Saratok, Haron Mahidi, bala tuai opis perintah sereta tuai raban bansa ke besemak.
Program Kembara Kenali Borneo (Bejalai Ngelala Borneo) berengkah 3 September tu tadi ari Tawau, Sabah lalu deka tembu pagila di Tanjong Datu, Sarawak.-TVS
