SARATOK, 12 Sept: “Berasai chukup betuah, siti peluang ti enda patut dilepaska pia aja enggau sempama mimpi nyadi nyata.”
Munyi nya ku jaku dipansutka sekeda perayat di Saratok lebuh dipinta TVS meri timbal bekaul enggau pengawa ngambat penatai Yang di-Pertuan Agong Al-Sultan Abdullah Ri’ayatuddin Al-Mustafa Billah Shah lemai tadi.
Ku Agatha Rames Michael Gomes, umur udah manggai 52 taun madah diri berasai betuah laban ulih sama nyereta bala rayat bukai ngambat penatai Agong mansa Simpang Saratok.
“Siti peluang besai baka tu endang enda ulih dilepas pia aja, kitai bela gagit deka betemu enggau Agong.
“Nyadi nyadi pagi tu berasai chukup betuah laban ulih sama enggau orang sama ngambat penatai iya (Agong),” ku iya.
Udah nya, siku pinchin pengajar ke beumur 61 taun, Sulong Pawi madahka diri berasai temegah ati laban tu keterubah iya ulih betemu enggau Agong.
“Aku berasai temegah laban tu terubah iya aku ulih betemu enggau Agong sereta tu mih peluang ke endang dianti-anti aku ngelama tu laban sebedau tu semina ulih meda mua Agong ba TV enggau gambar aja,” ku iya.
Nangkan ke nya, ba penemu Tuai Rumah Jemat Garak ari Rumah Panjai Malong Baruh Awik Saratok madah, pemujur ulih betunga mua enggau Yang di-Pertuan Agong disemaka iya baka mimpi nyadi nyata.
“Mimpi nyadi nyata mih tu endang iya chukup nyata amat-amat chukup temegah ke penatai Yang di-Pertuan Agong kitai baka diatu,” ku iya.
Ungkup penemu, malam tu bisi diatur Pengerami Nutup Program Kembara Kenali Borneo (Bejalai Ngelala Borneo) enggau Malam Makai Serumpu Perintah Nengeri Sarawak diatur ba sebengkah hotel tebilang di Kuching lalu program tu deka tembu pagila di Tanjong Datu.-TVS
