SARATOK, 10 Sept: Program Pengerami Makai Lemai ulih nyadi pelasar endur bala apai indai nembiak ngayanka sukung sereta bantu sida ngagai sekula.
Kaban Kunsil Nengeri (ADUN) Krian Friday Belik madah, pengerami ke baka nya mega ulih nyadi pelasar endur raban sekula ngedut kaul enggau bala apai indai nembiak.
“Peluang begempuru baka tu dikena kitai begempung ngiga chara nulung sekula ngiga belanja dikena ngemujurka aktiviti ba SMK Saratok.
“Kitai datai kitu ngayanka sukung ngagai sekula sama betulung meri belanja mimit,” ku iya.
Iya mansut ke penemu nya maya bejadika Pengerami Makai Lemai Sekula Sekondari (SMK) Saratok 2023 ba Diwan Tebuka Sekula Jenis Kebangsaan Cina (SJKC) Myn Syn Saratok, malam tadi.
Ku lalau Friday, raban apai indai anang sesekali ngelempai ke semua tanggung pengawa ngiga belanja sekula ba bahu bala pengajar.
“Kitai enda ulih 100 peratus ngeletak ke tanggungpengawa tu (ngiga belanja) ba bala pengajar, KPM, Opis Pelajar laban kitai nemu sida mega bisi penanggul takat diri empu,” ku terang iya.
Nya alai, rambau pengerami nya, Friday bisi ngagihka belanja nengah Projek Transformasyen Menua Pesisir (RTP) 2024 sepenyampau RM350, 000 enggau RM20, 000 agi diberi nengah Projek Mit Menua Pesisir (MRP) 2023.
Sama bisi datai ngulu pengerami ADUN Meluan, Rolland Duat Jubin, Sekretari Polik ba Opis Premier Sarawak Bell Bernard Aggan, Pegawai Khas Sapit Menteri Besai II, Leonard Jambu, Chairman Alumni SMK Saratok, Prof Dato Dr Spencer Empading Sanggin enggau ke bukai.-TVS
