KUCHING, 10 Sept: Datuk Patinggi Tan Sri Abang Johari Tun Openg madah diri lenyau siku bakih ke seruran bisi baik maya tusah enggau senang bekau ari pemidang Dato Sri Ambrose Blikau Enturan.
Premier Sarawak madah, niang Ambrose Blikau siku tuai ke udah bejalaika pengawa enggau manah sekumbang urung 40 taun megai sitak Kunsil Nengeri (DUN) Katibas.
Ku tandu iya, ba renggat parti, niang seruran talukka Parti Pesaka Bumiputera Bersatu Sarawak (PBB) nyengkaum maya parti nya betapi enggau penguji.
“Maya parti benung charut, niang begulai enggau tuai Iban ke bukai mengkang ngetanka PBB,” ku iya.
Abang Johari madah munyi nya ngagai pemberita pengudah meri basa kepenudi ngagai niang Ambrose Blikau ba rumah iya di Jalai Kedandi, Lorong 8 Tabuan Dusun ditu, tadi.
Sama bisi datai bini Premier, Puan Sri Datuk Amar Ju’amani Tun Tuanku Bujang. Sapit Premier Sarawak, Datuk Amar Douglas Uggah Embas enggau ADUN Tupong, Fazzrudin Abdul Rahman.
Ambrose Blikau,70, midang pukul 8.05 pagi kemari ba Palan Perubat Normah Kuching.
Lebuh ngelansa jasa niang, Abang Johari madah niang bendar ngempung parti – parti politik di Sarawak.
“Pengawa niang berupai maya ngempung semua parti (maya nya agi dalam Barisan Nasional) enggau tim kami ngemansangka menua lebih agi sitak menua pesisir,” ku iya.
Ngelansa pasal Katibas, Abang Johari madah niang mayuh bejasa sekumbang nyadi pengari rayat pengelama semilan penggal.
“Song majak mansang dibaruh pegai iya. Meda diri enda bepengerai, niang meri awak ngagai orang ke biak nyadi chalun dia,” ku iya.
Pengawa nguburka niang Ambrose Blikau deka diatur pagila ba Nirvana Memorial Park, Kuching pukul 11 pagi sepengudah tembu pengawa sembiang ba Gerija St.Jospeh. -TVS
