KUCHING, 7 September: Palan solar melepung keterubah Sarawak diatu benung digaga Sarawak Energy Berhad (SEB) ba Loji Hidroelektrik Batang Ai ke ditaga tembu taun baru mandangka pengeransing perintah Sarawak deka nyerungkai kuasa ulih dikemaru baka solar enggau hidrogen.
Direktor Kanan, Palan Instrumentasi Meteorologi Enggau Sains Atmosfera, Opis Meteorologi Malaysia Ambun Dindang madahka, pengawa nguna kuasa solar ulih mantu ngurangka pemansut karbon tauka gis rumah gadung ti ulih meri empas ke tau ngubah klimet.Ab
“Perintah Sarawak ti ngemansangka palan solar melepung tu endang nemban dikena mansutka kuasa kelimpah ari kuasa hidrogen.
“Pia mega kuasa solar tu enda ngamahka angin, ngeruga rampa menua sereta seruran ulih dikena sereta dikemaru,” ku iya madah rambau ditelefon pengarang berita TVS.
Beduduk enggau nya, Ambun nerangka nya singkang ke mua Sarawak dalam mantu mutarka isu ubah klimet tauka isu pengangat global ti nuntung dunya, seraya nyerungkai industri dagang karbon ti tau meri penguntung ngagai Sarawak dudi hari.
Ku iya madah, enti nyema isu ubah klimet tu enda diputar manah mayuh macham penusah nyadi baka ujan bangat ke ngasuh bah nyadi, angin biau balai, timpuh kemarau ke panjai sereta pengangat dunya majak nambah sereta mensia deka betapi enggau gelumbang haba tauka ‘heatwave’ ke enda manah ungkup pengerai.
Nitihka ripot, Premier Sarawak Datuk Patinggi Tan Sri Abang Johari Tun Openg madahka, pemisi palan solar nya ila dijangka deka nyemela anggar 52,000 tan pemansut karbon ninting taun ti nyaup pengawa ngurangka karbon dipansutka ari nengeri tu.
Iya madahka, bepelasarka kapasiti kuasa ke ulih dipansut enggau rentayan nyentuk taun 2031, Sarawak bisi penau masang kapasiti solar penyampau 1,500 megawatt (MW).
Abang Johari mega nerangka, SEB udah ngemunka projek 60MW Sistem Nyimpan Kuasa Bateri (BESS) ti bepalan ba Loji Janakuasa Batu Arang Sejingkat. – TVS
