SPAOH, 3 Sept: Program manah baka Bukit Saban Education Fair 2023 patut disukung laban ulih mantu meri penerang bekaul enggau pekara pelajar tauka pengawa puang ngagai raban ke disaran.
Kaban Parlimen Betong, Dr Richard Rapu madah, kebuah pia laban program ke baka nya ulih nyadi ke malin ngagai raban nembiak ba sekula sekondari sebedau gawa tauka nampung belajar ngagai ikas ke lebih tinggi.
“Aku sigi nyukung program ti manah baka tu diatur dikena meri penerang ngagai nembiak lebih agi sida ke besekula ba Pom Lima tauka Pom Enam ngambi sida ulih nemu ni bagi bidang ti patut dipasuk sepengudah abis belajar ila,” ku iya.
Dr Richard mansut ke jaku nya lebuh bejaku rambau pengawa bejadika Program Bukit Saban Education Fair 2023 ba Diwan Guna Mayuh di Spaoh, kemari.
Nangkan ke nya, ku iya tuju program nya mega ngambika mensia mayuh ulih mereti agi senentang penerang ke bekaul enggau siti-siti bidang pelajar tauka pengawa puang dikerindu sida.
“Ari program baka tu sida ulih nemu lalu nentuka ni bagi karier tauka bidang ti patut dipilih ngambi senang bulih pengawa.
“Enggau pengawa manah sereta gaji ti besai nya deka mantu negeri Sarawak nyapai status mengeri maju (bepenatai pemisi tingg) ila,” ku terang iya.
Bela bisi bejaku ba program nya, Chairperson Bukit Saban Education Fair 2023, Roselind Mapong Sabai madah pemanah ngatur program nya di Spaoh mantu ngelimatka belanja perayat ke diau besemak ngulihka penerang ke bekaul enggau pelajar sereta peluang gawa.
“Aku ngarapka program bekaul enggau bidang pelajar akademik tauka pengelandik tu ulih diguna raban nembiak di menua pesisir enggau manah.
“Kebuah pia, laban ukai mudah kitai deka mai sida tu (agensi) kitu lalu kitai (nembiak ditu) mega enda ibuh nurun jauh ke mengeri laban sida udah datai ba Spaoh ditu lalu mai semua penerang ti diguna kitai,” ku iya.-TVS
