KUCHING, 3 Sept: Gabungan Parti Sarawak (GPS) diperati deka belaban chara manah enggau komponen parti bukai dalam perintah penyerakup ba pengawa bepilih besai nengeri deka datai.
Pia ku Pemikir Sosiopolitik Universiti Malaya, Profesor Madya Dr Awang Azman Awang Pawi, sepengudah Chairman GPS, Datuk Patinggi Tan Sri Abang Johari Tun Openg mansutka penemu diri bekaul enggau pengentap deka nganjung semua chalun GPS ba 82 sitak penuduk kunsil nengeri (DUN) Sarawak.
Ku iya, atur belaban chara manah nya mega meri kelai dikena nentuka penegap gempung dalam perintah penyerakup.
“Ari penerang GPS ti deka bediri minta pilih ba semua 82 penuduk, reti nya PH ba Sarawak enggau GPS deka belaban chara manah dikena nentuka sistem demokrasi terus idup.
“Ari nya penuduk ke menang patut dibasa laban diulih chara demokrasi…iya nya enggau chara belaban enggau pangan diri,” ku iya.
Berebak enggau nya ku iya, ku Azman landskap politik di Sarawak mega bebida enggau landskap politik ba renggat nasional.
Nya alai, iya melabaka pekara ke sama deka nyadi ba pengawa bepilih besai ke deka datai.
Tang nya ku iya, bepanggai ngagai aum enggau penyadi politik maya nya.-TVS
