BETONG, 29 Ogos: Program Youth Entrepreneur Setup (YES) 2023 ti diatur di Betong nerima timbal ti positif ari raban nembiak.
Asil tinjau TVS, ketebal agi sida ngasaika program YES tu pelantar ke engkeman narak pengerindu dalam dunya dagang kelimpah nyadika bidang dagang entara siti industri ti mayuh dipasuk raban nembiak.
Siku ari penyereta program Clement Lasu Jhon, Program YES beguna laban mantu ngemudahka nembiak nemu penerang ke bekaul sentang pengawa dagang enggau kuing tuju sida dudi hari.
“Ba penemu aku pengawa baka tu (Program YES) endang sigi manah ngagai bala nembiak laban ulih meri penerang meri Expose ngagai bala nembiak awak ke nemu tuju lalu meri sida jalai sereta mantu sida iya.
“Nya alai, arapka mayuh agi nembiak ulih sama ngambi bagi ba pengawa baka tu (dagang),” ku iya.
Nangkan ke nya, siku penyereta program Marcella Ajar James Entring madahka nengah program nya raban nembiak berasai teperansang sereta lebih agi baka ni chara deka ngerandang dunya dagang.
“Program tu meri pemanah sereta pemansang ngagai nembiak rebak diatu laban sekeda orang ke udah abis belajar (baka kami).
“Ari program tu raban nembiak ke nadai pengawa tau bulih motivasyen tauka peransang nyadi siku orang lebih mujur.
“Ambika chunto program pengawa dagang baka tu ulih mantu sida ngerembaika pengidup sida (dudi hari),” ku iya.
Berebak enggau nya, Marcella ngarapka program baka nya patut suah agi diatur ke pemaik raban nembiak ti deka ngemajuka diri dalam pengidup nengah pengawa dagang.
Ungkup penemu, Program Youth Entrepreneur Set Up (YES) nya diatur ba Dewan Tan Sri Alfred Jabu ditu kena Hari Enam ke udah sereta dipenyadika Sapit Menteri Nembiak, Lumba enggau Main Sereta Orang Dagang Sarawak, Dato Gerald Rentap Jabu.
Sama bisi datai ngulu program tu Sapit Menteri Nembiak, Lumba enggau Main Sereta Pedagang Sarawak, Dr Ripin Lamat, Sekretari Mendam Opis Menteri Nembiak, Lumba enggau Main Sereta Pedagang Sarawak Morshidi Fredrick, Residen Betong Richard Michael Abu Nawas enggau ke bukai.-TVS
