KUCHING, 26 Ogos: Sapit Premier Sarawak, Dato Sri Dr Sim Kui Hian nesau mensia mayuh di nengeri tu patut nunda menua Korea Selatan lebih agi ari sukut pemagas gawa enggau ngembuan daya besemekih ke chukup tinggi.
Iya madah, pekara nya beguna dikena nentuka Sarawak nyapai status nengeri maju bepenatai pemisi tinggi manggai taun 2030.
“Aku kala nanya nama kebuah sida bagas gawa?
“Sida nayut aku, siti pekara ke dikemisi kitai iya nya mensia, orang gawa lalu sida nadai asil pengeraja asal bukai baka kitai,”ku iya.
Iya madah munyi nya maya bejaku ba Kimpin Bemalinka Korea, Annyeong Ku-Chingu diatur palan bebeli barang The Spring Kuching, sehari tu tadi.
Nangkan ke nya, ku Dr Sim rayat Korea chukup bagas iya nya sida gawa berengkah pukul 6 pagi nyentuk pukul 12 malam sereta enam hari dalam seminggu.
Nya kebuah, ku Dr Sim diatu kitai meda menua sida Korea chukup jauh maju.
“Orang Korea chukup maju ba teknologi, teknologi perubat, diatu semua bebuntas plastik endang ari Korea, lalu kitai deka nemu naka kebuah tim main bol sida manah, nya bekau ari pengeransing sida empu,” ku iya.
Nerang silik, Dr Sim ke mega Kaban Kunsil Nengeri (ADUN) Batu Kawa madah, iya ngarapka raban ari korea selatan ulih bekunsika chara nyadi sebuah menua bepenatai pemisi tinggi.
“Kitai mesti belajar ari sida. Kitai deka nitihka jaku Premier kitai (Sarawak), kitai deka bepenatai pemisi tinggi.
“Kitai deka semua orang meretika kitai patut bebendar ngulihka penatai pemisi tinggi,” ku terang iya.
Berebak enggau nya, ku Dr Sim, pengawa ngatur kimpin nya endang nemban laban diatu kuching majak mayuh pemeranak puku ari korea.
Kimpin Annyeong Ku-Chingu iya nya kimpin dikena ngerami budaya Korea Selatan, diatur berengkah 25 Ogos nyentuk 1 Oktober tu.-TVS
