ROBAN, 24 Ogos: Sepengudah lapan taun nadai diatur, nyadi taun tu Pesta Roban 2023 deka diatur baru ba Sungai Seblak berengkah 27 nyentuk 29 Oktober.
Kaban Kunsil Nengeri (ADUN) Kalaka Mohd Duri madah, naka tu bisi sembilan belas aktiviti udah disetujuka kaban komiti pengatur dikena matak penatai mensia mayuh ngusung palan endur ngatur Pesta Roban 2023.
“Pesta Roban deka diatur tiga hari berunggau 27 nyentuk 29 Oktober.
“Nyadi bisi 19 aktiviti udah diperambu raban komiti sebedau diputuska ba aum kedua nangkan ke tu ila,” ku iya.
Iya madah munyi nya ngagai TVS pengudah ngulu Aum Kaban Komiti Pengatur Pesta Roban 2023 ba Bilik Aum Opis Pelilih Mit Roban, tadi.
Udah nya, ku Mohd Duri sebaka enggau pengerami bukai Pesta Roban 2023 mega dikeandalka ulih nyadi siti ari produk dagang temuai dikena matak penatai mensia mayuh.
Kelimpah ari nya, aktiviti tu dikearapka ulih dikena ngedut kaul enggau diri sama diri kelimpah nyadi pelasar dikena nyungkak sosio ekonomi rayat.
“Ngelama tu kitai semina ninga aja Pesta Saratok, Pesta Gedong, Pesta Simunjan enggau ke bukai.
“Nyadi perayat di Roban mega deka berami begulai enggau pangan diri maya ba ujung minggu ba Roban.
“Nya alai, ari bisi pengerami baka tu iya deka ngedut agi pemanah kaul kelimpah bisi peluang endur mensia mayub bedaja enggau bejual bemacham produk bukai baka krafjari,” ku iya.
Ungkup penerang, entara aktiviti nyelai disadang ulih matak penatai mensia mayuh ngulu Pesta Roban serak tu kelimpah ari pekit lumba perau tu iya nya Pekit Batak Tali ba atas ai.
Aktiviti bukai ke bela diperambu deka diatur baka Pekit Nyumpit, Pekit Ratu Kebaya enggau Pekit Nyumai Pansuh Tiga Serumpun kelimpah pengawa ngerejister Kenyalang Gold Card (KGC) ungkup orang ke udah lunggar umur.-TVS
