SARATOK, 19 Ogos: Lelaki pemadu tuai ba Malaysia, Seliman anak Bandang, beumur 113 taun asal ari Rumah Mulok, Klua Krian ditu udah nadai ba Sepital Saratok, pukul 5.20 pagi tadi.
Pekara dikenukuka anak iya empu, Tuai Rumah Mulok anak Seliman ngagai pengari TVS.
“Apai midang pagi tadi sepengudah semilan hari diperubat ba Sepital Saratok,” ku Mulok.
Niang ada ba Tenggalat, Saratok kena 21 March 1910 lalu pemidang tudah ninggalka dua iku anak sereta menantu, semilan iku uchu enggau 23 iku ichit.
Ku terang Mulok, pengawa nyengai niang deka diatur kena malam 21 Ogos 2023 ba Rumah Mulok, Klua Krian.
Udah nya, pengawa nguburka niang deka dipejalaika 22 Ogos 2023 ba Pendam Kristian Klua.
Maya dirandau TVS, Mulok madah diri berasai temegah laban perintah udah ngemasukka nama apai iya dalam Malaysia Book of Record (MBR) nyadi lelaki pemadu tuai tauka gayu di Malaysia.
Bekau ari nya, bisi pengari rayat ke ngelala baka Kaban Kunsil Nengeri (ADUN) Kalaka Mohd Duri sereta sida menyadi, Penghulu Jali mega kala datai ngabas niang sekumbang ke berubat ba sepital laban ngelala niang peturun orang ke gayu di menua tu, ku iya.
“Nya alai, aku berasai berutang budi meda penyiru sida ke udah datai ngabas niang apai. Pia mega aku meri terima kasih ngagai bala misi sereta lutur ke chukup mentas ngintu apai sekumbang ke berubat ba Sepital Saratok,” ku tandu Mulok.
Ungkup penemu, nama Seliman dipasukka ba MBR nyadi lelaki pemadu tuai ba Malaysia kena 21 Julai 2021 nangkan nama pemegai rikod sebedau tu iya nya Abdul Rahman Abu Bakar asal ari Jerteh, Terengganu ti udah midang maya umur manggai 117 taun.-TVS
