DEBAK, 9 Ogos: Sapit Menteri Pemansang Indu, Nembiak Mit enggau Pengelantang Komuniti Sarawak, Mohd Razi Sitam madah, perintah diatu patut ngemanah agi sistem eKasih awakka sida ke rejister nyadi penerima endang raban ke patut dibantu.
Ku iya, sistem khas nya beguna bendar dikena nentuka siti-siti peminta nya endang patut dipasuk ba eKasih tauka enda nitihka siti-siti kategori.
“Ba jeman teknologi pemadah (IT) enggau media rama diatu perintah patut mesti bisi siti sistem ke lebih meruan dikena nentuka kategori komuniti sekalika nya miskin, pemadu miskin tauka B40, M40 T20 enggau ke bukai.
“Kebuah pia laban enti kitai ngeletak ke pengerejister eKasih ngerejister diri nerima eKasih awakka tau nerima bantu asai aku semua deka minta.
“Nya kebuah, kitai (Perintah) apin bisi siti sistem ke tetap dikena ngerejister raban nitihka penatai pemisi,” ku iya.
Razi ke mega Kaban Kunsil Nengeri (ADUN) Saribas madah munyi nya ngagai TVS pengudah tembu Program Kembara Merdeka Jalur Gemilang Tikas Nengeri Sarawak 2023 ba Diwan Millenea ditu, kemari.
Beduduk ari nya, Razi nyukung penuh penemu Premier Sarawak Datuk Patinggi Tan Sri Abang Johari Tun Openg TI minta nyerenih baru rintai penerima eKasih di Sarawak apin lama.
“Nya alai, aku sigi nyukung penemu YB Premier ti dekaka rintai penerima eKasih di menua tu diserenihka baru.
”Manah amat enti rintai sida dalam eKasih nya diserenih baru dikena nentuka penerima enggau rikod ti betul,” ku iya.
Sama bisi datai Pegawai Admin Opis Residen Betong, Florence Bulan Johnny ngarika Residen Betong, Richard Michael Abu Nawas, Sapit Direktor Opis Pemadah Sarawak ke mega Tuai Konvoi Kembara Merdeka Jalur Gemilang, Aziz Abdul Rahman enggau ke bukai.-TVS
