DEBAK, 9 Ogos: Pemansang Projek Kompleks Lumba Debak diatu udah datai ba renggat ke penudi, ku Mohd Razi Sitam.
Kaban Kunsil Nengeri (ADUN) Saribas nya madah iya udah dipadahka sentang pemansang Projek Kompleks Lumba Debak diatu udah manggai 95 peratus tembu nengah Kaunsil Pelilih Betong.
“Sehari tu (kemari) aku udah nerima WhatsApp ari Sekretari Kaunsil Pelilih Betong madahka raban kunteriktor diatu benung spray ngena chura mirah ba padang sintetik,” ku iya.
Razi ke mega Sapit Menteri Pemansang Indu, Anak Mit enggau Pengelantang Komuniti Sarawak madah munyi nya lebuh dirandau TVS pengudah bejadika Program Kembara Merdeka Jalur Gemilang Tikas Nengeri Sarawak 2023 ba Diwan Millenea, ditu kemari.
Nangkan ke nya, Razi mega madah diri anal projek ngaga kompleks lumba nya ulih tembu bulan September tu nitihka penerang ari raban kunteriktor projek.
“Udah tu sida (kunteriktor) deka ngaga garis nyadi tu renggat ke penudi mih kira tembu mih projek tu.
“Dipelaba aku enti nitih dipadah kunteriktur bulan September tembu lalu aku ngarapka utai nya amat ulih dikemujur,” ku iya.-TVS
