DEBAK, 9 Ogos: Sarawak mujur nyadika chunto ngagai mengeri bukai di Malaysia ketegal rayat ti ulih idup segulai sejalai sereta diau likun enggau pangan diri enda ngira pengarap enggau bansa.
Sapit Menteri Pemansang Indu, Nembiak Mit enggau Pengelantang Komuniti Sarawak Mohd Razi Sitam madah ulah segulai sejalai ke dikemeran rayat ngujungka nengeri tu mujur diangkat nyadi chunto penyerakup menua.
“Nya alai bekau ari pengaku nya kitai berasai temegah laban ulih beserakup dalam sebuah nengeri ke diuan pupu bansa.
“Ulah ke bansa tu dikemeran kenyau ari kelia munya,” ku iya maya bejaku bejadika Program Kembara Merdeka Jalur Gemilang Tikas Nengeri Sarawak 2023 ba Diwan Millenea, kemari.
Kelimpah ari nya ku Razi, ulah ulih beserakup enggau pangan diri baka nya patut ditan nyentuk ke serak uchu ichit jemah ila.
“Kitai bisi pengandal ke tinggi bepun ari gaya pengelembut tu deka terus nyadika tiang ngagai pemansang kaul bansa di Sarawak.
“Ulah Segulai Sejalai tu diatu udah nyadika rambai jaku dikemeranka Perintah Besai dikena nerebak ulah beserakup di menua tu,” ku iya.-TVS
