Enda kala mantul belatih nyadi kunchi pemujur
KUCHING, 3 Ogos: Fraidden Dawan, 37 anak Iban asal ari menua Bintulu antara jaguh nyemerai Para Malaysia ke patut dikelala peminat pengawa lumba bekau ari mayuh pemujur ti dijapai chukup ngemegahka menua nyentuk ke renggat Asia Tenggara (ASEAN).
Maya dirandau TVS, Fraidden madah dalam nyapai semua pemujur nya ukai pekara ke nyamai lebih agi sekumbang 14 taun begelar atlit Para nyemerai menua chukup mayuh pait manis udah diasai iya.
Nya alai, iya meransang rebak baru tauka bala bakih ke agi baru deka ngangkatka diri ba bidang lumba mesti ngembuan semangat berani baka Bujang Berani Iban kelia lalu ambi jaku peransang sida ‘Agi Idup, Agi Ngelaban’ nya nyadika pengering semengat lebuh besatup enggau orang ke dilaban (maya bepekit).
“Reti nya kitai anang sesekali dulu ngumbai diri alah, enti bedau bepekit. Anang enda ngembuan pengeliat ati, anang mantul belatih, pendiau mesti regas lalu runding mesti fokus sereta sabar nyapai juluk ati.
“Berekat ari pengepuh belatih sereta besabar jauh ari bini anak semua nya deka nadai berasai lebuh kitai mujur teketauka asil ambika banding baka nerima bonus tauka perais bekau ari pemujur ke udah dijapai,” ku iya.
Nangkan ke nya, Fraidden madah nadai tentu resia baka ni iya ulih beretan lama dalam bidang lumba.
Semua nya, ku iya ketegal pengangkun sereta endang rindu ke pengawa nyemerai lalu iya sempat meransang sapa-sapa ti bisi ati milih bidang lumba nyadika batang pengawa anang sesekali nyekat pengelandik diri empu.
“Diatu peluang ngemajuka pengidup diri sekalika ba bidang lumba tauka bidang bukai meruan tebuka ngagai sapa-sapa.
“Asal bisi pengeransing ati sereta nemu chara ngasurka diri enggau orang bukai besemekih laban peluang chukup mayuh disedia (perintah) sekalika ba renggat bagi menua, nengeri tauka nasional,” ku terang iya.
Maya terubah nyadi atlit
Lebuh mulaika pengingat diri senentang baka ni tau tepejuh ngagai bidang lumba nyemerai, ku Fraidden iya berengkah nguji masuk pengawa lumba dalam taun 2003.
Maya nya suba, iya madah diri benung ngambi Kus Vokasional Radio Televisyen di Kota Samarahan.
Udah nya, iya bisi enggau orang ngambi bagi ba pengawa milih atlit baru Paralimpik lalu iya pan mujur dipilih tang maya nya apin bisi program podium baka diatu ke dikemata Kaunsil Lumba Menua (MSN).
“Maya tu mih chukup mayuh penguji diasai enti orang ke sigi enda nakal sigi udah mupuk nyurutka diri.
“Tang ba aku empu laban ke endang rinduka pengawa tu dia aku nadai ngira pedis.
“Ari 2003 sampai 2009 mayuh pekit lumba dipasuk aku lalu mayuh mega (puntan) enda teulih ke pemujur laban nadai diberi latih ke meruan.
“Pia mega nadai orang ngatur elaun, palan endur diau sereta nyaga pemakai kami taja maya nya kami (atlit) dibaruh jaga Kaunsil Paralimpik.
“Seninjik bendar dalam taun 2009 dia MSN bisi muka Program Podium ke bepengkalan di Kuala Lumpur lalu nama aku pan dipasukka orang dia.
“Bekau ari nya, ari taun 2009 nyentuk diatu (2023) aku meruan dalam program nya (Podium).
“Nyadi semua pengawa latih, pemakai, endur diau endang meruan intu sereta dijaga. Nya baru aku bisi insur tejapaika bemacham pemujur ba pengawa lumba Paralimpik nyemerai ngarika Malaysia,” ku iya.
Tusah senang sekumbang nyadi atlit
Taja pan mayuh pemar diasai tang Fraidden siku orang ke chukup liat napi semua penguji. Munyi ku iya, lembau ngenang pekara ti ngemedis laban ke ngira diri empu enti bisi juluk ati ke tinggi ngujungka aja neruska pejalai singkang ke mua.
“Aku endang seruran meransang diri empu enggai mantul ngapa ba pengawa lumba nyemerai tu seagi ulih besemekih enggau orang.
“Penusah maya belatih tetap bisi lalu tang anang kelalu ngerunding nya. Kitai enda tau enda bebendar awakka ulih dipilih masuk siti-siti achara lumba,” ku iya.
Dalam pengawa lumba nyeremerai tu Fraidden dilatih siku Jurulatih Para Nyemerai ari menua China iya nya Li Xin Xin.
Ku iya, Li Xin Xin tu enatar siku orang ke balat ngemeratka disiplin lalu mayuh ngajar iya mesti fokus enti deka mujur.
Pekit deka dipasuk udah tu
Udah tu ila, Fraidden deka nyereta Pekit Lumba Para Asia di Hangzhou, China. Ba pekit tu, Fraidden endang nyaran diri empu tebaikka pulai midul emas ungkup menua.
Berebak enggau nya, Fraidden madahka juluk ati diri empu nyema udah pinchin jemah iya deka mekuhka pengawa nyadi jurulatih ba lumba nyemerai.
Kebuah pia ku iya ngambika ulih ngelatih sapa-sapa ti rinduka pengawa nyemerai.
Fraidden mega madah diri deka meda mayuh agi anak Sarawak dipilih masuk Program Podium MSN dikena ngerembaika agi bakat sida ba pengawa nyemerai.
Ku iya, nengah program nya bakat sida deka terus diansah lalu disabung bepekit ngambika ukai semina digelar ‘jaguh kampung’ tang dikearap tau jelai nama ba tikas antarabansa.
“Ungkup perambu dudi hari aku endang bisi ati deka nyadi jurulatih ngambika ulih ngiri penemu ngagai barang sapa ti rinduka pengawa lumba nyemerai tu.
“Ba aku empu, timpuh agi nyadi allit menua ngarika menua naka umur 45 taun. Nyadi maya umur udah manggai maya nya ila nyangka aku masuk bidang jurulatih awakka ulih ngelatih mayuh agi rebak baru tauka deka meda anak Sarawak ngarika menua Malaysia lalu besemekih ba tikas antarabansa,” ku iya.
Pemujur besai dijapai Fraidden
Lebuh dipinta ngelansa pasal sekeda pemujur besai ke kala dijapai sekumbang udah begelar atlit, Fraidden madah ba renggat lumba ASEAN aja berengkah ari taun 2009 suba lebuh dibai ngarika menua iya kala lebu.
Bukti iya berengkah taun 2009, dia iya mujur bulih dua midul emas ba Pekit Lumba Para ASEAN diatur ba Kuala Lumpur.
Udah nya, bulih tiga midul emas ba Pekit Lumba Para ASEAN 2011 di Solo, Indonesia ditangkan bulih tiga mega midul emas ba Pekit Lumba Para ASEAN 2013 ba Nay Piy Taw, Myanmar.
Ba Pekit Lumba Para ASEAN 2015 di Singapore, Fraidden mega enda ngelebu menua laban mujur mai pulai dua midul emas ungkup kontinjen menua.
Udah nya ba Pekit Lumba Para ASEAN 2017 di Kuala Lumpur, iya mega meri tuchum ngagai tim Para Nyemerai menua pengudah mujur mantu ngulihka dua midua emas.
Fraidden terus ngetanka rikod nyulut ba lumba nyemerai tikas entararabansa iya nya mujur bulih tiga midul emas ba Pekit Lumba Para ASEAN 2022 di Solo Indonesia enggau sekali agi menang tiga midul emas ba Pekit Luma Para ASEAN 2023 di Kemboja.
Ba tikas Pekit Rengat Benua Asia dalam taun 2010 maya nyereta Pekit Lumba Para Asia ba China, Fraidden mujur bulih nempa rikod ungkup diri empu pengudah bulih siti midul emas enggau siti midul engkeraju.
Udah nya, ba Pekit Lumba Para Asia 2014 di Inchoen, Korea Fraidden bulih siti midul pirak enggau dua midul engkeraju lalu ba taun 2018 maya nyereta Pekit Lumba Para Asia di Jakarta, iya bulih siti midul pirak enggau siti engkeraju.
Program Podium MSN
Ungkup penemu, Program Podium sebengkah program penyikap atlit nyulut ke dikeandal menua dibaruh Institut Lumba Menua (ISN) betuju ngangkatka nama menua ba tikas entarabansa.
Ambika chunto, raban atlit dibaruh Program Podium tu sida kala dianjung nyereta Lumba Olimpik lalu juluk menua deka ngulihka midul emas keterubah di Tokyo (2020).
Udah nya, ba Lumba Komanwel di Gold Coast (2018) Malaysia nyaran bulih penuduk sepuluh menua pemadu atas.
Nangkan ke nya, ba Lumba Asia 2018 di Jakarta mega, Malaysia ngandalka nengah Program Podium atlit menua ulih mai nama menua ba penuduk sepuluh pemadu atas.
Kelimpah ari nya, Program Podium deka nempa 10 iku atlit ba penuduk lumur enam pemadu nyulut ba dunya enggau ngetanka penyulut raban atlit kenyau ari taun 2020.
Bepelasarka rikod, mayuh pemujur udah dijapai menua asil ari Program Podium dalam ngemanahka rikod atlit dibaruh iring Direktor iya, Tim Newenham.
Ba taun 2022, Kabinet Malaysia setuju ngagihka belanja sepenyampau RM240 juta ungkup Program Podium lalu belanja nya deka diguna nyentuk 2025 sereta diagihka sepenyampau RM60 juta setaun.-TVS
